79歲馮淬帆激罕受訪現老態 盼趁健康拍「遺作」抗拒再演喜劇
2023-06-04 19:00 
80年代憑《精裝追女仔》、《最佳損友》、《五福星》系列深受歡迎的馮淬帆，原來今年年底將踏入80歲，日前他接受資深製作人楊紹鴻的節目《台友情緣的歲月》訪問，他希望趁身體還健康時，拍一套「遺作」：「題材我仲未諗到，不過我唔想拍喜劇。」
【相關閱讀】：王晶被鬧「王八蛋」121字反擊馮淬帆有被害妄想症 句句有骨鬧埋移台港人
【點擊馮淬帆最近新況】：
人稱「阿緊」的馮淬帆於1965年入行，曾效力無綫、亞視及佳視三間電視台，任職演員、導演、監製及高層，後期轉投電影圈發展，《最佳損友》飾演牛精帆，憑精警對白：「香蕉你個布冧」、「金山橙你個提子呀！」以及《精裝追女仔》中「收縮水」一幕而深受觀眾歡迎，後來馮淬帆移居在台灣定居，甚少在香港出現！今次馮淬帆現身接受訪問，外形確實是蒼老不少，但對答如流。不經不覺，馮淬帆入行已經超50年：「好多人以為我係拍電影，其實係先拍電視，畀楚原睇中咗之後先拍電影，合作過兩、三套電影後，跟楚原學做導演！」
馮淬帆曾經在TVB擔任導演，期間發生被「炒魷魚」事件，他說：「係我喺TVB發明拍外景，因為鍾景輝先生冇電影嘅感覺，後來佢將我升做導演，做咗一年左右畀TVB所謂『炒魷魚』，但我係唔認，係我發脾氣話自己唔做，件事好多人都知。」他續說：「嗰陣喺餐廳食飯時有個鬼仔過嚟搞我，我記得我搵糖潑佢，嗰個鬼仔真係好乞人憎！但原來佢係股東嘅屋企人，鍾景輝就話冇辦法幫到我，唔知對方係股東嘅孫定仔，一定話要炒我，咁我就話好呀！我辭職，咁到底係邊個啱都唔知。」
雖然在鏡頭前的馮淬帆談笑風生，不過鏡頭後的他態度嚴肅，令不少人「聞風喪膽」，他更因為有「阿緊」這個花名，但馮淬帆表示：「其實係我恩公后叔（陳有后）叫我做『阿緊』，啲人咪開始跟叫，到咗我做導演，啲人叫我做『緊張大師』，嗰啲唔係叫好緊張，係叫認真，你冇見過我拍戲會好趕時間嘅？我係好有計劃，但係好認真冇緊張，變得好大脾氣。」他又說：「我拍戲係冇得傾，最好朋友都反面，私下同我越老友越死得慘，如果係我老友，亂嚟嗰陣唔鬧你咁又點得，啲人會點睇？」談到過往的作品，馮淬帆最喜愛的竟然是這兩部：「我最鍾意一套係我做演員嘅《癲佬正傳》，同埋我導演嘅《愛的逃兵》，但觀眾都係記得我做嘅喜劇，我唔知點解，即係話我唔識做戲？剩係識做喜劇？」
目前馮淬帆處於半退休狀態：「喺香港最後一套叫《老笠》，直到最近先有客串，我成日諗一個人要有遺作，自己導演比較鍾意啲嘅戲。題材好難講，真係準備時先會知，又唔輪到你話唔睇市場，但係我唔想太迎合，唔係就拍畀自己睇啦！主要係唔想拍喜劇，可能我自己唔演，做導演都未定，呢個仲未好深入去諗，只係希望身體仲可以就拍呢套戲。」
【其他文章】：
姚子羚加國探小背心鍾嘉欣 網民集體回憶15年前《金石良緣》姊妹情
萬眾同心公益金2023丨夏大衛博士4.5萬呎家族大宅開金口 巨型壁畫雕塑具氣派
陳凱琳4歲大仔鬼馬整包老師讚有天份 網民揭秘呢個部位夠大有福氣
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應