古天后日誌｜港股反彈萬九未必能企穩

6月5日，日間短暫時間有陽光，初時局部地區有狂風雷暴，及有幾陣驟雨，天氣炎熱。美國上周五公布非農數據表現強勁，不過國會順利通過債務上限，資金流入令美股上周五大升，道指升701點；標指升61點；納指升139點。標指喺4200點爭持一段時間，企穩4100水平又向上突破，正向4350-4400呢啲較大阻力位挑戰。

之前一直有講，美股呢一輪升勢過份集中，升勢集中喺FAAMG幾隻重磅科技股身上，蘋果升至新高，公司快將舉行WWDC大會，提防新產品公布後，股價回吐。除咗蘋果之外，微軟亦令道指跟標指高居不下，AI概念支撐股價高企，集團已開展企業測試Office AI功能，呢個項目每年可為公司帶嚟額外1億美元收入，呢個係未來微軟盈利增長嘅催化劑。

5月非農新增就業人數達到33.9萬，遠超預估的19萬人，上月修正至29.4萬，服務行業保持擴張。就業雖回升，但失業率喺4月創3.4%新低後，5月雖回升至3.7%，但亦遠高過預期3.5%。目前美國經濟正處於衰退十字路口，高科技行業仍裁員，但服務行業喺復常後不斷招聘，人手仍然不足。呢個係導致近日通脹數據開始橫行並有回升勢頭嘅原因。不過時薪增長方面有所放緩，加人工搶人嘅情況已無之前咁嚴重。

週末拜登簽署債務上限法案後，財政部未來3個月將發行7300億美元新債券，股市跟債市齊齊搶資金，且看環球資金流會否出現變化，一旦美元轉強，將對新興市場不利。雖然美股勁升，但中概股高開後，尾市升幅收窄，升勢由回補空倉所帶動，淡倉回補後，資金唔再繼續追貨。雖然上周成交額一度因為MSCI及恒指rebalancing而增加，但扣除指數rebalancing嘅成交，港股喺上周挾升嘅同時，成交額未見配合。暫時大市喺18000點支持不俗，但回升至19000水平或又見阻力，主要係中港兩地經濟復甦不似預期，通脹卻持續高企，咁嘅經濟情況下，股市有反彈，挾升都係短暫，缺乏資金流入難支持強勁反彈或轉勢，港股經過五窮月，即使6月開局反彈唔太絕，但亦難以太樂觀。