古天后日誌｜二萬關守而成交配合 19500為好友重要防線

6月19日，大致多雲，間中有幾陣雨，日間短暫時間有陽光，早段局部地區雨勢頗大及有雷暴。上周五美股四巫日，三大指數略為低收，道指跌108點，標指跟納指分別跌16點及93點，標指仍守於4400水平之上，貪婪指數已升至82平，美股已進入極度超買範圍，投機意味更濃。5月以嚟美股一直強勢，好大原因係順勢挾淡倉，上周五完成結算後，尾市已無再見冚淡倉盤入場，今晚美股假期，目前要更審慎觀望。

國會通過債務上限後，一如預期大舉發債，聯儲局隔夜滾存熱錢，降至2萬億美元左右，較5月中2.25萬億元減少2500億元，預計至9月底，發債將抽走市場約7000億美元流動性。不過即使流動性減少7000億元，仍有1.5萬億元熱錢，流動性仍然充裕。

中概股上周五高開低走，電商平台舉行618購物節，但在此之前，京東(09618)早已率先大灑金錢進行推廣促銷，去年618京東銷售額增長約25%，但淘寶只有8%，若今年連京東增長都唔做得好，只怕淘寶只會更差。估計今日京東跟阿里(09988)股價未必會因為618購物節而受到刺激上升。

美國國務卿於週日訪問中國，但未有受到高規格接待，市場憧憬中美關係緩和，可能最終落空，雙方暫時只係開啟打破僵局之門，但談不上係關係大有改善。國常會結束，但傳聞中嘅刺激經濟政策未見影縱，未知呢個星期會唔會有政策出台，暫時似乎睇唔到阿爺可以出乜嘢招。週四港股假期休市，週五到A股休市，但上周五港股成交額卻增加至1700億元以上，恒指更重上20000點，然而北水卻連續兩日錄得淨流出，兩日淨流出過百億元，似乎北水都唔肯坐定定。成交額有所增係好事，只係要有資keep住流入先有用，若然呢個星期又打回原形，成交額又回復至1300億元之下，北水又繼續沽貨走人，只怕二萬關難以企穩，暫時睇返條50日線同250日線附近，19500點會係好友重要防線，一旦失守，恐怕本輪反彈結束。