古天后日誌｜港股雖重上250日線 提防假突破隨時掉頭

7月14日，大致天晴，但局部地區有驟雨，日間相當酷熱。美國隔晚公布PPI好過預期，美股升勢持續，喺市場憧憬息口快將見頂下，科技股繼續做領頭羊，納指升219點，不過開始有資金買入舊經濟股博業績，銀行股明顯有資金流入。今晚多間銀行公布業績，喺息差擴闊及去年基數較低嘅較應下，較大型銀行業績應有唔錯表現，但經過3月份地方銀行倒閉及擠提事件，小型銀行業績當然無眼睇，市場較關注管理層指引，睇下壞呆帳撥備有否回落。由於商廈借貸壞帳增加，重磅銀行股或需為此增加撥備，而信用卡業務可反映美國零售業狀況，對預測稍後公布業績嘅零售股或有啟示。

6月份美國CPI好過預期，而PPI更跌至負值，PPI已經連續15個月下跌，當工廠成本亦進入負值，出廠價將回落，有利通脹進一步降溫。其實從中國嘅PPI數據，已可以反映全球通脹未見惡化，中國更正面對通縮，作為世界工廠嘅中國出現通縮，有助控制全球通脹。

美股升勢停不了，美國加息預期降溫下，美匯下跌，利好股市氣氛，而人民幣反彈亦造就港股回升，港股連彈多日，已先後收復10/20/50日線移動平均線，今日進一步修復250日線，走勢繼續向好。

目前恒指仍剩下100日線(19690)尚未修復，唔少人認為企得返上去250日線，就有機會繼續向上，但睇返過去幾個月100日線多次未能成功挑戰，今日要留意會否高開低走，未見100日線已回頭。若然出現穿頭破腳走勢，喺短線超買之下，出現回吐嘅機會其大，至於呢一段反彈浪會否結束，50日線(19278)及20日線相當關鍵。古天后一直強調港股只係有波幅，冇升幅，唔排除繼續保持上落市格局，只有且戰且走，靈活走位，港股尚未到可以坐定定等食大茶飯嘅時候。