古天后日誌｜內地經濟數據強差人意 中港股市難有起色

7月18日，多雲，間中有狂風驟雨及雷暴，初時部份地區雨勢較大。美股踏入業績期，上周五高開低走，但隔晚喺Tesla跟蘋果等創新高帶動下，高開高走，三大指數向上，納指跟標指更升穿今年高位，道指升76點；標指跟納指分別升17點及131點。市場預期本月聯儲局再加息0.25%後，將停止加息，息口快將見頂，好友仍主導大市，高盛表示喺6月份，對沖基金出現過去32個月以嚟，最大單月空倉回補，反映美股喺本輪升勢下，淡友不得不投降。

值得留意下周一納指將出現rebalancing，本來佔納指比重超過五成嘅7隻權重股，將由56%降至44%，即係納指由科技龍頭帶動嘅情況有所改變，估計下周一將有近百億美元追蹤納指基金，將按變化進行調整，7隻權重股或按比例被動減持，可能會影響納指表現。

美股業績期展開，上周五嘅銀行股率先揭開序幕，基本上銀行股業績表現都係優於預期，早前已見資金偷步買貨，所以公布業績後，嗰堆銀行股都係高開低走，有獲利盤湧現。今晚輪到美銀及高盛喺盤前公佈業績，留意美銀手上信用咭業務增長如何，壞帳率會否上升。

至於隔晚帶動大市上升嘅Tesla，首部Cybertruck量產車下線，股價業績前偷步炒上，隔晚升3.2%，週三晚收市後有TSLA業績。今年各電電車均以減價搶銷售額，內地醠有車廠出現經營虧損，連阿爺都要出手調停，各大車廠暫承諾唔再減價。不過Tesla以另類方式變相減價，推出「介紹費回贖」優惠，即是變相減價。目前預估第二季度Tesla毛利率仍會低於20%，雖然營收增長有望超越40%，但估計喺毛利率下降嘅情況下，盈利增長唔會多過一成。以其目前股價接近300美元，PE高於80倍嚟計，股價能否喺業績後持續高企，仍要睇市場嘅接受程度。

至於中概股方面，隔晚係逆美股而行，而上周五夜期跟ADR港股表現不濟，噚日因為颱風休市，今日返嚟港股難免受壓，主要係內地噚日公布嘅經濟數據繼續差過預期，反映內地經濟增長仍未及預期。加上恒大拖咗咁長時間，終於喺周末公布過去兩年業績，2022年總營售2300億人仔，毛利只有249億，毛利率只有10.8%，經營虧損433億，另外還有693億的土地被收回、金融資產減值等虧損，再計及所得稅開支130億，合計淨虧損1258億元。呢份業績當然係未能夠令恒大可以夠資格復牌，過往唔少人仍抱一絲希望，恒大公布完業績可以復牌，但一間公司已經半死，進入植物人狀態，就算出咗驗身報告又如何，植物人就係植物人，長期昏迷醒唔返。呢份業績令人最傻眼嘅地方係，集團總負債高達2.43萬億，其中有7210億合約負債，即係欠已賣出業主嘅金額，餘下的1.71萬億，其中6123億係借款，其餘1萬億係貿易帳欠款，其中拖欠工程供應商便高達5961億，呢啲欠款都係爛帳收唔返。

恒大呢份業績，可以清楚反映目前內房產業嘅困局，過去一直靠房地產業支撐整個經濟，呢個產業鏈崩潰，中國經濟神仙都難夠。單係睇返個青少年失業率達到兩成以上，內地經濟想喺Q4復原，似乎無乜可能，經濟唔好，自然無資金肯投入股市，想內地跟港股翻生，唯有睇阿爺有冇乜嘢新招推出救經濟，暫時睇嚟睇去，都睇唔到阿爺仲有乜招可以出。