初選案｜何桂藍否認在協調會曾發言「立法會變成一個抗爭陣地」

民主派47人參與「35+」初選，涉嫌計畫立法會過半無差別否決《預算案》被控，16人否認串謀顛覆國家政權罪。被告何桂藍今午於西九龍法院表明早年「已經覺得《財政預算案》要否決」，解釋每年財案內1,000億基本工程儲備基金均不准審議，政府綑綁上萬個工程逼使立法會通過，當中包括不受歡迎項目，「我會形容呢個係公共財政黑洞」。何桂藍揚言如問題持續「有五大訴求嘅話我都會照投反對票」。 

何桂藍憶述新界東首次協調會議中有地區組織與會，共20至30人到場，約長2小時，會上各人輪流自我介紹，再就公民投票或民調表態，終在何桂藍劉頴匡立場強硬下決定採用公民投票，並採納靈童制，但會上眾人發言不多「一句起兩句止」，自己亦不記得戴耀廷會上發言內容。何桂藍另指當時得悉提名表格會連同一張新界東協調共識，只有參選人有份簽署，亦代表其必然會公開，故自己滿意做法。何桂藍續指翌日亦有人向傳媒透露會上消息，而第二次會議才討論否決財政預算案，以及6或6+1的目標議席。何桂藍指被捕前從未見過「35+計畫」文件，沒有印象協調會議上曾經傳閱，會後也沒有收過文件紀錄或協議，另交代自己和戴耀廷單獨交流只有二人互相加為facebook 朋友。 

Trevor Beel引述趙家賢供詞指何桂藍曾在協調會議發言指「立法會變咗一個抗爭陣地，而佢希望將立法會用作中港關係破局」、「將整個制度推到盡，將本身中國同香港嘅一國兩制整個政治制度個運作整個去打破」，又指「聽到本土抗爭派會上好進取地甚至對於中央政府一啲嘅訊息好漠視」，何桂藍一概否認，反駁指自己6月才開始提出「破局」，未曾說過「推到盡」，只會說「建制內的臨界點」，而且出自facebook 6月內容。 

何桂藍直言早於2011年任職記者跟進立法會新聞時「已經覺得《財政預算案》要否決㗎喇」，解釋「問題唔喺條實數度，係財政預算案點樣draft出來、點樣計出來，年年都係差唔多嘅，譬如我而家就可以講⋯⋯因為喺立法會入面呢，就算你攞到70席，你都唔可以幫公共醫療系統加一個鏰。每年財政預算案大概5,000至6,000億，我而家就可以話畀你聽，下一年又會有1,000億喺基本工程儲備基金入面。《財政預算案》係一個有連續性嘅文件，唔通你話畀我聽，下年警務處唔會有撥款咩」。 

何桂藍續指「因為當我發現連建制派要求派錢，但係曾俊華堅持要投落MPF嘅時候，明明建制派攞住大多數，佢哋當年除咗否決臨時撥款議案同施壓之外，乜都做唔到。我相信法庭而家都好理解，立法會議員只可以攞一個總目入面嘅細項入面去減錢，唔可以加錢唔可以加items，亦都唔可以改變嗰年財政開支嘅方向」。何桂藍指直到2017年報導橫洲事件才知道，財案內有一項基本工程儲備基金，佔《預算案》6份之1比重，「但係喺審議財政預算案嘅時候，係唔准審議呢嚿嘢，呢嚿嘢入面政府每年有少於2,000至3,000萬嘅工程⋯⋯成萬個工程bundle（綑綁）埋一齊，而政府就係會將一啲唔受歡迎嘅工程，化整為零，拆成啲咩前期工程呀、渠務工程呀噉樣分項，全部擺晒入基本工程儲備基金，然後用其他9,000幾項冇爭議嘅工程，逼立法會一定要通過佢。我會形容呢個係公共財政黑洞。」 

何桂藍明言「無論有35+定係冇35+，如果我係議員，只要我見到財政預算案入面有啲我冇辦法去審核嘅東西，我認為我投反對票，先至係履行緊我作為議員嘅憲制責任」，更補充指「就算五大訴求落實，如果我頭先所講嘅呢啲黑洞問題，政府透過程序去迴避議員監察嘅問題，仍然存在嘅話，有五大訴求嘅話我都會照投反對票」。 

《香港國安法》指定法官陳慶偉問如2020年政府提出《預算案》時依樣葫蘆，何桂藍是否會否決？何桂藍激動指「2020年正正就係陳茂波開始動用未來基金嘅一年⋯⋯呢3000億政府本身2016年成立未來基金嘅時候，講明10年唔可以郁，同埋如果郁要經立法會批准，但係2020年開始，陳茂波就不斷喺入面攞錢繞過立法會，一開始係注資國泰，然後話搞北部都會區，而家話搞香港淡馬錫。我必須要指出，嗰度每一分都係納稅人嘅錢，但係納稅人喺呢個制度之下，係完全阻止唔到佢哋嘅行為」。法官李運騰問到何桂藍出於財案的某些項目或方式而反對，而非出於「35+」？何桂藍明言「唔係一啲項目或者一啲規矩，係成個公共財政審核制度」。 

法庭記者：陳子豪 

---       

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ