初選案︱ 何桂藍指戴耀廷連建制派都想說服加入35+

「35+」初選案續審，被告何桂藍今午於西九龍法院供稱戴耀廷「從來都係佢要包攬最多最多嘅香港人參與⋯⋯佢係連建制派都想說服埋35+」，在制度內讓更加多港人參與。何桂藍解釋其參選宣言指「我認為唔會因為想留住一啲本來就建立喺privilege（特權） 同浮沙上面嘅自由⋯⋯而去接受一個表面繁榮實際上不斷破壞香港嘅status quo（現狀）。我會形容呢個係所有參與2019年運動嘅選擇」。

大律師Trevor Beel主問引用戴耀廷2020年5月到7月多篇文章包括〈戴耀廷：攬炒，To burn or not to burn？〉及〈搶灘功能界別要靠「藍轉黃」〉，何桂藍交代當時曾經讀過文章，戴耀廷甚至倡議立法會「40+」以至取得46席。何桂藍憶述當時社會討論抗爭是否需要激進化以吸引更多人支持，但戴耀廷「從來都係佢要包攬最多最多嘅香港人參與⋯⋯佢係連建制派都想說服埋35+」，由2017、18年主張區議會「填白區」開始到初選一直如是，在制度內讓更加多人參與，故其構想運用立法會權力條款時主要想將所有民主派派系囊括在初選之內，而非應對中共打壓。

Trevor Beel再引用何桂藍6月18日發佈的參選宣言指「反抗，先可以改變到香港嘅宿命」，何桂藍解釋當時港人仍抱有幻想「香港有維持現狀呢個選擇，但係一國兩制之下，當一國不斷變化，兩制係冇可能維持現狀」。何桂藍直言「香港冇可能永遠留喺冇民主但有自由嘅呢個幻想入面，我認為唔會因為想留住一啲本來就建立喺privilege（特權） 同浮沙上面嘅自由⋯⋯而去接受一個表面繁榮實際上不斷破壞香港嘅status quo（現狀）。我會形容呢個係所有參與2019年運動嘅選擇」。

何桂藍再補充自中英談判以降，「至少國家主席個位唔係終身制先啦下嘛」，然而2012年之後中國大陸情況不斷惡化，「香港憑咩覺得自己可以偏安一隅，維持一個有法治有自由嘅地方呢？」何桂藍續指過去港人經常聲言「守住法治」、「守住議會」，「我認為呢種心態會令情況愈來愈差，事實上乜都守唔住」。

何桂藍重申反抗和自我實現其實是一體兩面，「所以『反抗先可以改變香港嘅宿命』嘅意思，就係我哋要做我哋相信嘅嘢，我哋要尋求去實踐我哋認為我哋應得嘅權利，即使我哋明知噉樣會招致好大嘅打壓，唔去褪，而係去堅持去做我哋本身做緊嘅嘢，先至可以改變到香港嘅宿命⋯⋯喺打壓嘅人嘅眼中，我哋做嘅所有嘢都係反抗緊佢，但係喺我哋自己嘅角度，我哋從來都係實踐緊一啲我哋想實現嘅東西」，來反抗極權逼害打壓。

《香港國安法》指定法官李運騰追問用甚麼方式反抗？何桂藍指「佢哋唔畀我哋進行真正嘅民主選舉，透過DQ、透過國安法去恐嚇同埋嘗試操縱個選舉，但係我會形容初選就係一場由香港民間去做、符合民主原則嘅選舉。即係話，我哋透過我哋實踐我哋相信嘅民主究竟係點樣樣，去抗衡佢哋對民主嘅打壓」。

Trevor Beel再問「面對極權，我哋的確一無所有」的意思，何桂藍指「當我哋選擇抗衡極權嘅時候，香港畀我哋係冇任何嘅制度保障嘅，即係我哋會承受一啲我形容係法外打壓，但係我哋依然去選擇去噉樣做」。Trevor Beel又問「多年以來，呢個不民主嘅議會，都係吸納、消弭街頭運動能量嘅地方，但而家民眾嘅強大的意志，已經走在政治領袖嘅前面」，何桂藍解釋立法會現時無法履行憲制責任監察政府、落實倡議或阻止惡法及不義撥款，然而每次有大型社會運動，最後都會轉化成後來的選舉資本，但是議會無法落實社會運動所爭取的訴求，相當於吸納了社會運動的政治能量，在制度內一無是處。

李官則問到「喺今時今日嘅香港，議會要去助燃場運動」一話何解，何桂藍解釋旨在回應當時主流說法，「好多市民其實都好清楚或者甚至都會講立法會係廢嘅，同埋佢哋會話真係要去選，唯一有用嘅作用係攞10萬蚊人工來幫抗爭者，否則純粹就係純粹係轉移大家嘅視線，由場運動轉咗去個議會嗰度」，而自己就想回應說法指議會「唔可以做好多嘢，佢只可以助燃，但係佢仍然有一啲關鍵嘅作用」，但具體而言初選之後，當選議員如何作為何桂藍當時無法想像。

法庭記者：陳子豪

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ