頭條戲場丨《貴公子》超過癮麻鷹捉雞仔

2023-07-25 08:00

2021年尾，憑韓劇《海岸村恰恰恰》紅到黐線的金宣虎，因為被舊愛老屈即變渣男，工作全停，《貴公子》導演朴勛正冇離棄佢，仍舊維持選角決定，事件真相大白後即火速開拍。戲中金宣虎飾演的貴公子亦正亦邪，一笑就令人心寒，擁有陽光笑容的正氣仔變身邪惡獵人狙擊目標，招牌「酒窩」反令詭異效果加強，睇完戲終於明白朴導點解一定要死攬金宣虎。 (上映中) 撰文:廖思慧

導演睇中金宣虎呢個笑容，簡單望住你笑已搞到你心寒。

本來嘅陽光笑容變邪惡笑容，導演真有心思。

揸緊車都KEEP住笑，魔鬼嚟嘅。

唔只用車追，貴公子都有用腳追，跑住都笑，好黐線。

睇戲學生字，Kopino即是韓國男人付費跟菲律賓女人發生關係後所生的混血兒，冇感情當然亦冇責任仲要被歧視。戲中打黑市拳的男角馬可就係Kopino，導演從1,980人當中挑選新人姜太䝬擔任此角。為了表現出拳拳有力，姜太䝬苦練一個月拳擊，加上翻滾及跳躍兼超大量奔跑場口，全部親身上陣，對白唔多見佢係咁跑，好似睇緊《阿甘正傳》咁，真係辛苦晒。

姜太䝬為演拳手苦練一個月，但其實戲中冇乜打拳場口。

馬可為避貴公子係咁跑，跑足半場戲，睇到結局後就明晒。

戲中動作場面都幾多元化，有跳橋又有爬屋頂。

金宣虎極charm
朴導今次仍舊玩佢最鍾意的黑幫人設，不過跟上一套《暗夜天堂》唔同，《貴公子》加入大量黑色幽默，邊諗到飛車加打打殺殺加狙擊會有笑位，仲要幾好笑，而笑位來自半反派金宣虎。要返回韓國搵老竇的馬可是故事主角，但電影的主角絕對是首登大銀幕的金宣虎，虎迷入場絕對唔會失望。

戲中成日笑的貴公子為追捕馬可由菲律賓追到去韓國，再飛車由山路追到去窄巷，一直冇解釋點解要咁做，觀眾緊貼馬可情緒起伏，同樣諗唔明，至最後跟馬可一齊揭開貴公子真身，恍然大悟。爲了展現朴導想要展現的「本能生存的鬥爭意圖」，動作指導HWANG Jin-mo表示：「我捕捉了狙擊者和被狙擊者之間的差距所産生出的恐懼與絕望。」無論貴公子及馬可，還是大奸角韓理事跟馬可的對峙，絕對做到當中的恐懼與絕望。