古天后日誌｜留意大市會否高開低走 阿里業績或未能帶動大市回升

港股｜ 8月11日，大致多雲，間中有驟雨及狂風雷暴。隔晚美國公布CPI，升幅少於預期，美股全面高開，三大指數升逾1%，不過有聯儲局委員指CPI雖然偏向溫和，但仍支持加息去繼續壓抑通脹，重申通脹目標係2%。美股應聲由高位回落，但三大指數維持上升，道指升52點，標指僅升1點，納指升幅亦縮水至不足16點。雖然標指已逼近4,450點首個支持，幸好VIX未見急升，維持喺17樓下，收報15.85元，仍然安全，市場未見恐慌，只係美股現價估值已經唔平，就算暫時未見較大幅調回調，都只會喺現水平橫行。

7月CPI升3.2%，好於預期嘅3.3%，但高於6月嘅3.0%，由於CPI去年6月升幅達到9.1%，基數偏高下，今年6月同比計算方法下才會出現3%嘅低增速，但去年7月高基數回落，同比計算方法自然會出現回升，估計8月有機會回升至3.7%水平。值得留意係美國房價正開始回升，估計3個月後房租價亦會回升，由於房租佔CPI比高達42%，10月後CPI或加速回升，呢個亦係聯儲局堅持今年唔減息嘅主要原因。至於利率市場看法不變，今年仍保持5.25%唔再加息，明年首季度開始減息，全年推算減息1.25%。

業績期已屆尾聲，資金由早前炒大價股，上月已開始流向細價股，近日變本加厲開始炒迷因股，WeWork周三宣佈有機會破產，股價大跌38%，唔少空軍加入追沽，結果引來WBS吹雞挾空倉，週四大量散戶買入Call option賭挾沽空，成交量較put option高出100倍，散戶湧入令股價一度狂升147%。不過呢種如同賭博嘅方式炒法，相當危險，反映美股有部份散戶已變得唔理性。

阿里業績好過預期

阿里（9988）噚日收市後公布業績，業績表現好過預期，隔晚股價喺ADR一度高見紅底，但未能企穩，更帶動夜期一度高見19,500點水平。不過美股其後走軟，中概股高開低走，結果夜期由500點高位回落，幾乎打回原形，去返日期收市價附近。

今日預期大市將跟隨巴巴高開，但古天后唔多相信阿里巴巴可以帶領港股今日高開高走，尤其見到噚晚夜期回落嘅表現，更愈發認為今日嘅走勢係高開低走。留意雖然周三及周四港股日線圖出咗陽燭似要回升，但過去兩日均未重返周二大陰燭嘅頂部19,370點，若然今日彈到19,370點前無功而還，基本上又係淡友進擊嘅時候。如果再失守全部平均線，大市有機會下試18,960點回補裂口，裂口回補後未能重返19,000點水平企穩，睇怕大市或繼續向下尋底。

相關新聞：

港股市況｜恒指高開71點 阿里績後升3% 傳碧桂園籌備債務重整 急跌10%

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ