古天后日誌 ｜人民幣跌跌不休 港股持續向下尋底

港股｜8月21日，天氣炎熱，大部份時間有陽光，間中有幾驟雨。美股上周五期權結算，美股先低後高，道指轉跌為升，倒升25點，標指則微跌不足1點；納指跌幅收窄至26點。標指已跌穿4,400點至4,450點第一支持位，下一個支持位為4,300點至4,350點，睇睇嗰個位有幾大支持。美股業績期已屆尾聲，標普成份股平均每股盈利下跌3.8%，遠較預期倒退6.5%好，業績期美股一直炒上，但到業績期尾升，因為唔少股份已炒高，估值亦唔算平有所調整亦相當合理。業績期過去，市場焦點開始轉去年度央行嘅Jackson Hole會議，會議嘅內容將會為9月議息留下線索。

人民幣跌跌不休，中港兩地股市表現疲弱，上周五內地金融三大巨頭，包括人行、中證監、金融監管總局齊齊開會，聲言調整優化房地產信貸政策，及提醒金融機構主動加大貸款投放力度，人行相應再下調貸款市場報價利率（LPR）。可惜市場一樣無面畀，皆因內房企業接二連三爆雷，內房債務危機已引發市場憂慮中國會否出現中國版雷曼嘅金融危機，南韓金融監督院亦於上周四成立中國房地產金融風險監測工作組，當局認為，中韓經濟息息相關。

碧桂園（2007）及恒大（3333）嘅債務風險，暫對南韓實體經濟和金融市場嘅直接影響或有限，但事態演變及內地政府如何應對，可能成為變數。南韓都要搞個小組嚟對應內房債務危機，可見全球各國對內房債務危機嘅憂慮已逐漸升級。

喺內房債務危機愈演愈烈之際，內地經濟狀況亦每況愈下，股市持續下挫。上周恒指失守18,000點，滬深300指數上周略為跌穿近3個月的底部。上周五港股ADR再跌過百點，夜期更跌至17,683點今年新低，睇嚟今日港股都係瓜多過菜，初步支持為17,500點至17,600點，失守進一步下試17,300點，若然盤中有反彈，但又未能重返18,000點水平企穩，港股只有進一步向下尋底。
 

相關文章：

港股市況｜恒指穿萬八後再下挫 開市跌152點 內地釋出放水訊號

---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ