專欄｜愛華頓成績與戴治進化密不可分

愛華頓開局認真平平，同上季一樣繼續在下游中爭扎，一眾球迷們會諗戴治足球已經係過時嘅產物，應該要被潮流淘汰，但戴治真係冇貨賣定其實暗藏玄機？

筆者與球迷們一樣，以前一講起戴治，都係飛沙劈石，全部人縮喺禁區入面，有危險就解圍先，全部都係長傳，斬入禁區搏混亂，個波永遠喺天空上面飛。不過其實戴治上任愛華頓之後都有唔少變化，防守方面，逼搶真係最大嘅特色，每場波都會因對手實力不同而加入壓逼，唔單只等人地過左中場線先逼，更加會到敵方禁區嘗試爭搶，特別是中場伊祖沙古爾喺前面失波的話，更加會帶動三線向前，一定會如狼似虎咁逼返個波返嚟，因為佢係防守樞鈕。

進攻方面，儘管傳中同死球仍然係戴治嘅拿手絕活，不過今季簽入幾位球員如比圖比東卡、丹祖馬等人，都有一定自己持球突破能力，經常會靠個人能力壓到心臟地帶射門，同時由以往順足變成逆足翼鋒，將兩翼cut in，然後射波機會大增，出波嘅任務就交俾兩閘。今季僅有兩個入波只能話係腳頭無靈，其實球隊今季總共創造了10個黃金機會，與紐卡素並列第8，顯示出戰術不是拖肥最大嘅問題，卡維特利雲長期缺陣，加上入球運欠佳，才是愛華頓在下游周旋嘅最大關鍵。

筆者覺得愛華頓與戴治其實是天作之合。一間坐落於利物浦，工業城市嘅球會，亦於英超成立以來從未試過降班，有豐厚嘅歷史。而戴治則是由以往英倫風慢慢融入現代足球，亦創造過般尼神奇之旅與上季助拖肥成功護級等不少英雄事蹟，希望今季戴治可以帶領愛華頓盡早逃出護級旋渦，唔使打到最後一輪。Willhappy

-----

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ