古天后日誌｜低成交下大戶說了算 唔做點心避之則吉

10月6日，部份時間有陽光，天氣乾燥，日間天氣酷熱。市場觀望美國今晚公布就業數據，投資者態度審慎，隔晚美股偏軟，三大指數反覆，道指盤中曾跌逾100點，其後收市跌9點；標指則跌5點；納指跌16點。VIX喺18.5水平徘徊，波幅開始收窄，等埋今晚嘅就業數據先會有更清楚方向。

美聯儲連日放鷹，令到長債息失控式向上，一旦債息失控，可能引發金融市場大震盪，喺巨大風險前，終於有官員出來平衡市場心理，舊金山聯儲主席Mary Daly指近期債息咁樣升法，已等同美聯儲再加息一次，所以年底前再加息機會不大，呢個亦係美股隔晚低位反彈原因。其實喺過去兩年，聯儲局表現一直令人失望，動作遠遠落後市場，一直被市場帶住嚟走，大戶就製造消息惡意沽空，今年3月嘅銀行風暴，正正係由空軍自編自導嘅一場鬧劇。

美債息急升，令資金流入美元， 喺7月份日股成為最受投資者喜愛嘅市場，但隨住美匯指數節節上升，日股喺9月成為外資出逃最大數目嘅地區，過去兩週外資拋售近3萬億日圓日股，係疫情以嚟新高，市場情緒逆轉加快。

冬季將至，市場憧憬歐洲能源危機再現，7月熱錢偷步將油價從66美元炒上95美元，但市場需求疲弱，估計喺油組減產後，供應仍然過剩，因此油價從95美元回軟。

商品市場方面，紐約期油未止瀉，再跌2.27%，每桶收報82.31美元；布蘭特期油跌穿85美元，為8月底以來首次，曾低見83.84美元，收市報84.07美元，挫2.03%。世界貿易組織(WTO)周四把今年全球商品貿易增長預測，由4月時估計嘅1.7%降至0.8%，主因來自歐美通脹肆虐、俄烏戰爭持續及中國復甦緩慢。

市場觀望今晚出爐嘅最新美國非農就業數據，至於港股本周首兩個交易日累挫逾600點後，噚日牛皮靠穩，成交更創五年低位，超細成交下小幅回升18點，夜期跟ADR回升，估計今日港股將反彈，能否重演上兩個星期五嘅挾淡倉，咁就好難講，不過喺低成交之下，大戶要舞高弄低實在容易，唔想做大戶點心，呢啲情況都係避之則吉。

相關文章：

中美元首傳11月會晤 港股開市升156點 今晚美股聚焦非農就業數據

---
星島X理大攜手推動永續發展 「ESG認證計劃暨嘉許禮」2023  把握報名機會 https://bit.ly/45kDhn5

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ