古天后日誌｜港股需企穩五日線方能脫險

12月11日，短暫時間有陽光，午間氣溫略升至27度，今晚局部地區能見底較低。美國11月份就業數據好過預期，同時最新消費者通脹預期急降，市場愈發相信美國經濟可以軟着陸，但減低對減息嘅憧憬。上周五美股反覆造好，全周計道指微升2點，變化不大，標指升0.8%，納指升1.25%，三大指數已連升六個星期。

聯儲局將於本港時間周四凌晨公布議息結果，市場預期將維持利率不變。不過喺市場對減息預期降溫，以及就近日美股強勁表現嘅情況下，鮑爺隨時又放鷹，股市下行壓力較大。市場普遍預期，聯儲局本次會議將唔會有乜嘢動作，重點係聯儲局會後發表嘅聲明及主席鮑爺有乜嘢講，相關訊息將作為市場衡量未來息口路徑嘅重要參考。

另一個焦點係其他央行的議息會議。繼聯儲局之後，歐洲央行、英倫銀行、瑞士央行及挪威央行亦會喺周四公布議息結果。除咗挪威央行外，其他央行預料維持利率不變。市場目前預期，歐洲央行明年將減息6次，較聯儲局多1次。歐洲央行管理委員會委員會後發言，將對市場預期產生影響。

美銀料10年債息回落至2.25%

美銀剛出報告指若美國開始減息，估計是次減息期幅度將令10年債息最終會回落至2.25%水平。目前美國債市空軍仍未肯投降，3倍長債ETF TMF，其沽空率仍高達700%，沽空規模達280億美元之多，就連長債ETF TLT，債市空軍仍然繼續加碼沽空，其空倉比例已升至68%，規摸達330億美元之巨。議息之後，美國債市將會出現好淡友對決。

不過美股空軍陸續撤退，早前美國政府進一步限制Nvidia產品輸華，其股價經過前週下跌後，上週已開始止跌回升，可見市場購買力強勁。不過一線股份升得太勁，市場資金已開始轉炒三四線股份，近期就RUSSELL 2000指數已跑贏標指。美股喺資金充裕下，策略上仍然係逢低吸納。

上週五A股3大指數低開高走，收市後中央政治局發表2024年經濟工作會議，嚟嚟去去又係得一個字「穩」，但實際刺激經濟措施欠奉，暫時內地外貿未見好轉，內需樓市又爆，地方債又爆，阿爺求「穩」，唔再爆雷已謝天謝地。

港股場內仍然資金不足

至於港股最大問題仍然係場內資金不足，2600隻股票裡有超過七成每日成交額少於10萬元，當中零成交嘅竟佔三成以上，市場效率低迷，入市資金質素差。即使偶有北水入場，亦只肯參與100米短跑，資金未見停留，至於外資long fund，早已一去不返。

周末內地公布11月消費物價指數下跌0.5%，為2020年以來最大降幅，內地或開始進入通縮年代，可能成為港股今日再跌嘅借口。黑期今早偏軟，港股或繼續低走，下試16200關及上周低位。即市反彈阻力為5日線16423現，升穿並收於其上才有好轉，否則繼續下探16000大關向下尋底。

---
《星島申訴王》將推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ