呂麗君晉環最後一伙撻訂貨 低3年前15%沽出

華置前主席劉鑾雄前女友呂麗君（現名呂姵霖），於2021年一擲約1.4億買入黃竹坑站上蓋項目晉環4伙，已全部撻訂離場，市場昨日承接最後一伙撻訂戶。成交紀錄顯示，1B座42樓A室，面積919方呎，以3,000萬售出，呎價32644元，單位較2021年以3,536.4萬的售出價，低約15%。

呎價32644元

呂氏4伙撻訂單位先後獲承接，昨日售出最後一伙，換言之4伙均全數沽清，成交價介乎2,780萬至3,000萬；呎價30,250至32,644元，共涉額逾1.1518億。

 連掃晉環 大劉形容「豬頭炳」

「大劉」去年11月記者會上曾指呂麗君大手入市晉環豪宅是蠢的行為，因為首期僅付10%，另外又付15%稅予政府，預期難以完成交易，更形容是「豬頭炳」。

 重溫大劉記者會：

大劉上周開記者會，句句劍指呂麗君。

大劉記者會吸引多間媒體採訪。

現場有工作人員派口罩。

全部記者均戴上口罩。

1. 談恆大許家印：「我從來冇嬲佢，我係嬲我自己，因為我老婆同佢家姐講過不下200次，叫我賣啦賣啦，我話我賣先佢一定X街，快得過佢應該要X街。」

2. 談有人拿民事傳票給他：「我見壞人都見唔少，但咁X賤咁X壞嘅人，都係第一次見。」此時有記者問：「壞過凱婷？」大劉顯得有點一頭無緒：「吓？壞過咩？咩凱婷？」記者解釋是潮語，意指好壞嘅女仔，大劉說：「我唔知，真係唔識呢啲嘢，我呢啲又老又out，而家識喇，但我都唔知咩意思。」

3. 談「賤人」變壞之前有否勸籲對方：「梗係有，但係有用咩？唉……我淨係講佢全家都係納米型、納米型嘅賊仔，全家。」

4. 談會否分身家給「某啲賤人」：「賤人梗係唔會啦！你呢個問題都有少少問題啦！我長命一萬歲都冇機會啦！佢實破產㗎！貪到死，乜嘢都要借。」

5. 談對方蝕得最多投資：「佢以前同我講倫敦買咗啲物業返嚟，全部都係作出嚟！我而家夠話美國白宮都係我負責起㗎，任我吹，你信唔信吖？我而家想呃你啊，靚女，你想住倫敦白金漢宮，定華盛頓嘅白宮？你信唔信吖？我諗全世界1萬個有錢佬都買唔到呢兩棟物業。佢講大話唔使眨眼，出口成詩㗎！」

6. 談子女知否母親所作所為：「I really don't know！我真係唔知，佢好識洗腦㗎……一支牙膏、一張單都claim3次，呢句說話我作出嚟嘅話，我絕子絕孫，七個仔女養唔大啊！」

7. 談最近一個月有否改遺囑：「佢唔止牙膏claim三次，喺超級市場地下啲單，佢都執嚟claim，你估我唔知咩？……佢最擅長係點呢？買咗個名牌袋之後，平價賣返出街。我記得40幾年前去夜總會，啲舞女最鍾意搵老襯。5千蚊買日本時裝，我就收返4千蚊現金，時裝舖就剩袋1千，40年前好興呢啲嘢㗎。」

8. 談對方子女已長大會否獨自生活：「你問得真係好，我真係想擁抱你，唔係想非禮你啊。」

9. 談有人投資失利：「買埋啲Accumulator，I'll kill you later！」

10. 談有人去新加坡招搖撞騙：「我夠可以喺電視同拜登合照、P圖話佢企喺我隔籬啦！以前台灣有套電影叫《養鴨人家》，你知唔知鴨同鵝分別，鴨只係做女人生意，鵝就男又做女又做。呢啲係佢嘅私生活佢嘅事，唔關我事。」

 

樂翠台每呎2.2萬易手

豪宅持續獲承接，跑馬地雲地利台一個高層4房單位，最新以4900萬成交，原業主持貨約39年轉售，帳面獲利4640萬，期內單位升值約18倍。

中原分行高級分區營業經理李穎倫表示，雲地利台C座高層6室，面積1863方呎，4房1套間隔，單位原本開價5500萬放售，最終累積減價600萬或約10.9%，獲用家以4900萬承接，呎價26302元。

據悉，原業主於1985年以260萬買入單位，持貨約39年轉售，帳面大賺4640萬，單位期內升值約18倍。

市場消息透露，跑馬地樂翠台A座中層4室，面積1147方呎，新近以2600萬易手，呎價約22668元。資料顯示，原業主於2001年以692萬買入，是次轉售帳面獲利約1908萬。

相關文章：

呂麗君4伙晉環全數撻訂 料被殺訂1,400萬 3個單位已先後大平賣售出

---

【上車驗樓，星島搵專家幫你手！如果你有新盤驗樓、裝修分享，請即Email：[email protected] 】

《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF

想睇更多精彩內容，請立即瀏覽「區區有申訴」活動專頁，https://bit.ly/41hgS9E

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ