楊梓菁唔會公開BB爸爸身份　疑患產前抑鬱狂行樓梯催生丨獨家

2024-03-23 08:00

楊梓菁（Wiyona）早前突然宣佈已誕下B仔Jace，並解釋非刻意隱瞞升呢做媽咪，只因意外懷孕後情緒出現問題，疑患產前抑鬱，產後傷口又發炎，才於囝囝4個月大公佈喜訊。對於囝囝爸爸身份，Wiyona跟圈外男友有共識將不作公開，暫未有結婚計劃的她，期待囝囝未來做花仔行婚禮，她正努力操fit身形，計劃全面復工。採訪：杜杜攝影：朱偉彥首飾:@marylyn.style 場地:No.2

Wiyona當媽咪半年，開始適應一切以Jace為先的生活。

Wiyona跟圈外男友意外懷孕，初次陀B令她壓力超大，情緒更出現問題，疑患產前抑鬱，「最初唔記得有咗會撞親，之後就太擔心成日諗啲負面嘢，BB會唔會突然冇心跳？臍帶繞頸？好想佢快啲出世。」她試過突發脾氣大鬧朋友，「朋友話『你做咩成日催BB出嚟，住耐啲好湊啲㗎』，難聽過粗口，我好惡咁話『又唔係你陀，你試吓陀吖』。」為快點生B更用盡方法，「聽過行樓梯有幫助，屋企隔籬有條400級樓梯，就叫阿媽陪我每晚行5、6轉，但冇用，BB都要催生，較預產期遲1日出世。」

Wiyona陀BB時零孕味，「完全冇浮腫，肥胎唔肥人手腳仲好瘦，7個月先明顯啲。」

Jace半歲大已重達20磅，Wiyona和媽咪已抱到有媽媽手。

操靚身形全面復工

Jace出世時重8.2磅，Wiyona本打算順產最終都要開刀，但因她睇少這一刀，結果搞到傷口發炎，「以為坐月喺屋企就得，冇概念要真係休息，成日走去抱BB，郁動好多，傷口成日摺埋咗就發炎，有血水流出嚟，要打麻醉針洗傷口，真係痛不欲生，又上奶胸又痛，夜晚冇陪月又要4個鐘餵一次奶，好想打暈自己瞓返覺好。」正因忙於照顧BB及身體，她暫未有計劃跟男友結婚，「結唔結婚有冇嗰張紙其實冇分別，或者遲啲先，唔使咁急，我都期待結婚，諗過個仔做花仔嘅畫面都想喊，都想有日可以實行。」她跟男友有共識不會公開其身份，「佢係專業人士，唔方便喺報紙雜誌出現，唔想影響到對方。」

童年Wiyona冇Jace咁肥嘟嘟，但神態同嘴仔都好似。

Wiyona笑指Jace有點大叔feel。

Wiyona希望事業同家庭取得平衡，「keep住做嘢係keep返自信同價值，與時並進先可以教仔，唔可以成日屈喺屋企，全世界得個仔。」不過她暫時未能跟囝囝分開太耐，「BB 4個月時，有套劇要返內地拍10日，BB太細而推咗，到佢1歲應該可以飛，近嘅可以帶埋佢去都得。」她已開始操返靚身形，「好耐冇做運動肌肉都流失，依家要慢慢操返fit，拍打戲都冇問題。」