衛詩雅低潮期曾獲「施捨」工作勁Hurt 入行16年經常得罪人冇嘢撈丨獨家

2024-04-06 07:00

衛詩雅（Michelle）憑電影《不日成婚2》，首獲提名金像獎最佳女主角，得悉一刻興奮到喊，她感恩團隊努力被看見。入行16年，Michelle坦認率直易得罪人，令演藝事業一直浮沉，更試過獲「施捨」工作，「點解你要咁hurt我？！」。採訪：杜杜攝影：朱偉彥髮型:Sing Tam@ArtifyLab 化妝:MW 服裝:Maje 場地:BOLD COFFEE

Michelle希望嘗試不同角色，最期待在全綠幕下演出及做黑道大家姐。

Michelle當日跟《不日》團隊一齊睇金像獎提名直播，聽到宣佈入圍一刻，團隊嗌到癲，她亦開始爆喊，「我真係唔係好相信，我不斷問自己『係咪發緊夢呀？點解咁好彩咁幸運呢？！』嗰個感覺係為《不日成婚》團隊爭一口氣，有人睇過我哋套戲，有人鍾意㗎！」她又將功勞歸功於團隊，「一定唔係我做得好，係成個團隊好，拍嘅時候演員同幕後幫咗我好多，好錫『曾可怡』呢個角色，好錫我，係佢哋造就咗呢個角色。」

Michelle憑《不日成婚2》的「曾可怡」，首獲提名影后。

Michelle獲提名最感謝兩集《不日成婚》的台前幕後。

Michelle興奮劇中「奶奶」金燕玲獲提名最佳女配角。

Michelle將《不日成婚》推薦給公司，一手促成電影誕生。

做人太過暢所欲言

由於《不日》有兩集，Michelle認為投票時會多了感情分，而她亦跟角色一同成長，看到「曾可怡」由充滿棱角，到碰到不少困難磨蝕棱角，彷彿看到昔日的衛詩雅，「有個job，人哋叫我sale呢樣嘢，嗰頭同人講『我覺得唔好用』，我係會咁樣，好深刻，完咗畀人鬧到呀！好傻好真呀！後果就係人哋唔搵你做嘢囉，哈哈！」不過她現在已學精，識得包裝一下，「我都會照講我嘅不滿，表達呢樣嘢好唔好，但係會修飾、包裝吓先，以前會直接話『好難食』，依家會話『唔係好啱我口味』。」她承認以往做人舒服，但明白必須要成長，「我好懷念以前嗰個自己，好想做返，好率性好舒服，暢所欲言，但人哋會唔舒服，最好攞個平衡，慢慢學識呢啲嘢。」

《不日成婚》的「曾可怡」，令Michelle重拾當年率真的自己。

Michelle完全冇信心攞影后，只求有更多演出機會。

期望鍾雪瑩封影后

問到有沒有信心奪影后？Michelle秒答：「冇！哈哈！」她明白愛情喜劇入圍已經很難，攞獎更加渺茫，但她坦認恨攞獎，「我想攞嘅原因係唔想俾人遺忘，想人哋鍾意我演嘅戲，唔想casting時，唔記得衛詩雅原來係演員。」有份參與頒獎禮已令她很滿足，「好開心可以喺現場睇，仲可以坐前面㗎，着好靚嘅裙行紅地毯，本場刊仲可以畀我啲曾孫睇，哈哈！『你睇吓太婆以前影過呢啲相』，已經好開心。」她更希望在ViuTV劇《瑪嘉烈與大衛系列絲絲》首合作的鍾雪瑩，能憑《填詞L》首奪影后，「呢個女仔氣質好好，好純潔無瑕嘅靈魂，佢啲戲又好，好想佢有好成績，之後嘅路會行得好舒服，好想保護同幫佢，佢好值得。」

Michelle開心獲提名，可以有份拍攝金像獎頒獎禮場刊。

Michelle睇好鍾雪瑩封影后。

首演戲視終身職業

Michelle形容自己並非天才型演員，不聰明的她全靠不斷努力。入行16年首拍TVB青春劇《四葉草之盛裝舞步愛作戰》時，已認定演戲是終身職業，「演員可以畀你好任性去感受唔同職業。」就算現在貴為影后候選人她仍覺事業浮浮沉沉，講到入行後最低潮時期，她想到多年前有段日子零工作，有次獲邀跟陳家樂為品牌影雜誌宣傳照，一通電話令她感覺很受傷，「工作人員話『我哋施捨你哋㗎咋』，呢件事我好深刻，好難受，大家都係呢行，點解用到施捨嚟形容？！我哋係咪真係做得咁差呢？！好以有幾千蚊畀你哋已經好好，係傷心㗎！我當然好嬲嗰個人，我唔係神好大愛，唔會講啲咁假嘅說話啦！點解你要咁hurt我？！」不過這段經歷沒有打沉Michelle，反而咬緊牙關捱到今天。