專欄│球證美拿體現「配菜勝主菜」

作為球迷對於剛過去的歐聯和歐霸盃8強賽事，實在回味無窮。歐聯方面，皇家馬德里對曼城大打出手成3:3，技戰術層次極高，是今屆歐聯暫時的巔峰之戰，兩隊已連續3屆相遇，今屆最明顯分別在於皇馬的中場速率和跑動上，已在換血後能真正地跟曼城正面衝突，加上前線球員的極高個人能力，有足夠條件殺低曼城這隊世上最強；巴黎聖日耳門和巴塞隆拿一戰，對比下球員技術含量未必差太遠，但戰術發揮和後防的緊密就差了不是一星半點，簡單一句就係未成氣候，反而馬體會對任何對手都有一定機會。

今年歐霸盃給我印象卻更深，賽事水準極高，有利物浦、上屆歐聯4強AC米蘭，再加入仍不敗的利華古遜，當歐聯睇水準上根本無乜分別。利華古遜對韋斯咸的全面輾壓，英超內有幾多隊做到如此水準？沙比阿朗素留隊下屆帶隊打歐聯實在令人期待。

今周最令人驚訝的首推阿特蘭大，在不被看好下作客晏菲路大炒利物浦3蛋，非常夢幻。然而，這場比賽真正令我驚艷的是土耳其球證美拿的流暢、合理、準確的執法，有配菜比主菜更美味的效果，更重要的是，睇開英超的我會越來越認為自己唔識球例到懷疑人生，想去Check吓個腦，但美拿就好似醫生同我講：「你份驗身報告正常。」令人鬆一口氣。馬高

-----
《星島申訴王》已推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰https://bit.ly/3uJ3yyF

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ