周勵淇4歲囝囝冧功超勁：佢話養我公開教仔秘笈學做人緊要過識字丨獨家

2024-04-26 07:00

周勵淇（Niki）於2018年12月宣布跟內地演員傅浤鳴結婚，2020年誕下兒子Morris，因為久違新作《超意神探》上映，靚媽興奮受訪，自爆被圈中人誤會已息影，實情是疫情加上囝囝年紀細而減少工作。未做媽媽前，Niki一向唔多講私事，但今時唔同往日，一講湊仔就停唔到口，坦言好享受做媽媽，強調小朋友必定要有禮貌，又公開囝囝𠱁死媽媽的生活日常，更甜笑表示「真係好冧呀」。採訪：杜杜攝影：朱偉彥場地:星影匯

Niki表示做媽咪後更享受返工，「似放假多啲仲輕鬆，所有嘢有人安排好晒。」

Niki於疫情時拍攝《超意神探》，飾演心理醫生「李慧藍」，接拍原因是一直想合作，但未有機會合作的張家輝，她還大讚跟前輩有商有量演戲，過程相當愉快。自誕下兒子後，Niki工作量大減，她自爆早前出席電影導演會春茗，被不少圈中人誤會已息影，「我冇息影，只係撞正疫情，小朋友又細，𠵱家開始我會接返多啲戲嘞！」

Niki一直好想同張家輝合作，「睇吓喺佢身上學到啲咩」。

《超意神探》中，Niki飾演心理醫生。她稱只要工作適合，離港幾個月都冇問題。

Niki出前出席電影導演會春茗，被不少圈中人誤會已息影。

唔PO囝囝正面相有原因

Niki透露做媽媽後轉變好大，更稱這個演一世的角色責任很重，「真係唔容易，24小時，要練習耐性，又要同佢一齊學好多嘢，喺囝囝身上都了解多咗自己。」講到對Morris期望，她只想囝囝是個開心正面的人，「三觀要好正確，出到去會好受尊重，得人鍾意，家庭教育好緊要，好似海綿咁吸收，大個好自然就有嗰啲嘢。」

Niki在 2018年12月宣布跟內地演員傅浤鳴結婚。

Niki和傅浤鳴只要有時間，就會陪囝囝周圍玩。

對於家教，Niki強調好嚴，特別重視囝囝要有禮貌，「冇禮貌去到邊都唔得，佢知屋企有工人姐姐，都要去講多謝、唔該，要執返自己嘅嘢，仲有望住人對眼打招呼，講嘢唔可以郁嚟郁去。」Niki坦言唔擔心囝囝的學業，但要佢早啲學識做個好人，「寫字遲早都會識，但壞習慣好難糾正返。」另外教仔亦不會假手於長輩或工人姐姐，「家庭教育係父母，即係我身上，呢個角色係我製造出嚟，負返責任，我係好enjoy呢個角色。」她坦認因為老公要求故未有公開囝囝樣貌，亦不想將來被囝囝埋怨，「等佢識得分先，自己post，我唔會阻止，但唔想未問過佢就擺出嚟，可能佢第時會怪我，唔想做啲嘢令自己後悔。」

去年母親節Morris除了送花，還唱了首歌送給Niki。

去年Morris生日會，甜爆錫錫媽媽。

Niki笑指囝囝好口疏，「佢返學校會將屋企啲嘢講晒出嚟，哈哈！」

一秒笑喊遺傳演戲細胞

從Niki公開的唔見樣照片，可見下月才足4歲的Morris相當高大，「佢未夠4歲，好似6歲咁高。」Niki笑言有家族優良遺傳，而且跟家姐周汶錡的兩個囝囝似樣，而性格就跟湊大他的婆婆最似，「我媽媽係上海人，好多嘢講，阿仔識講啲上海話，又係好多嘢講。」另外，性格開朗的Morris是「問題兒童」，「佢係happy baby，好多嘢問，好多都唔識答，問到我有時懷疑自己，佢問我『太陽去咗邊度瞓覺』哈哈！好得意，佢知道月亮喺第2個星球嚟，又鍾意睇科學嘢，話想做太空人，可能要報啲科學班畀佢。」Morris更遺傳了父母的演戲細胞，「佢好drama㗎！一秒鐘爆喊，一秒鐘嘻嘻笑，唔做戲嘥晒。」聽到媽咪要外出，Morris更會狂講甜言蜜語𠱁媽咪留低，「佢會話『你唔好去啦！你陪吓我啦！你去邊啫！你唔好返工啦！』我話我唔返工你養我呀？佢又話『我養你囉！我都可以去返工，等我大個啲，食多啲飯就可以養你』。」（其實幾冧㗎？）係㗎！但係講之嘛！哈哈！我即刻好理性咁話『等你大個啲先啦』。」

Niki指Morris較同齡小朋友高，「醫生話高過標準好多。」

Niki稱Morris跟周汶錡兩個囝囝最似樣。

Morris好照顧婆婆，「佢話婆婆老，出街要拖實，又幫佢同工人姐姐做繙譯。」

5月18日是Morris生日，因跟母親節相近，每年都會一齊慶祝，Niki更趁機教囝囝要錫媽咪多啲，「同佢講『你生日其實都關媽媽事，因為喺我個肚攞你出嚟』我有畀佢睇個疤，佢知道會好心痛，會問我『你痛唔痛㗎？我幫你呵呵佢啦！』我話『所以你要乖啲囉！你生日都係我好痛嘅日子，所以都要同我慶祝㗎！』後尾佢就話『好啦！我同你一齊切蛋糕啦！」Morris要求今年生日會再以英雄人物為主題，不過原來他從未睇過相關電影，「Marvel系列嗰啲英雄佢全部都鍾意，但佢未睇過，全部都係我講畀佢聽，佢鍾意睇書，未畀佢睇戲同平板電腦，電視睇指定兒童節目，每日半個鐘，佢好珍惜嗰半個鐘，但係我知唔可以維持好耐，做得幾多得幾多囉！」