周励淇4岁囝囝冧功超劲：佢话养我公开教仔秘笈学做人紧要过识字丨独家

2024-04-26 07:00

周励淇（Niki）于2018年12月宣布跟内地演员傅浤鸣结婚，2020年诞下儿子Morris，因为久违新作《超意神探》上映，靓妈兴奋受访，自爆被圈中人误会已息影，实情是疫情加上囝囝年纪细而减少工作。未做妈妈前，Niki一向唔多讲私事，但今时唔同往日，一讲凑仔就停唔到口，坦言好享受做妈妈，强调小朋友必定要有礼貌，又公开囝囝𠱁死妈妈的生活日常，更甜笑表示「真系好冧呀」。采访：杜杜摄影：朱伟彦场地:星影汇

Niki表示做妈咪后更享受返工，「似放假多啲仲轻松，所有嘢有人安排好晒。」

Niki于疫情时拍摄《超意神探》，饰演心理医生「李慧蓝」，接拍原因是一直想合作，但未有机会合作的张家辉，她还大赞跟前辈有商有量演戏，过程相当愉快。自诞下儿子后，Niki工作量大减，她自爆早前出席电影导演会春茗，被不少圈中人误会已息影，「我冇息影，只系撞正疫情，小朋友又细，𠵱家开始我会接返多啲戏嘞！」

Niki一直好想同张家辉合作，「睇吓喺佢身上学到啲咩」。

《超意神探》中，Niki饰演心理医生。她称只要工作适合，离港几个月都冇问题。

Niki出前出席电影导演会春茗，被不少圈中人误会已息影。

唔PO囝囝正面相有原因

Niki透露做妈妈后转变好大，更称这个演一世的角色责任很重，「真系唔容易，24小时，要练习耐性，又要同佢一齐学好多嘢，喺囝囝身上都了解多咗自己。」讲到对Morris期望，她只想囝囝是个开心正面的人，「三观要好正确，出到去会好受尊重，得人锺意，家庭教育好紧要，好似海绵咁吸收，大个好自然就有嗰啲嘢。」

Niki在 2018年12月宣布跟内地演员傅浤鸣结婚。

Niki和傅浤鸣只要有时间，就会陪囝囝周围玩。

对于家教，Niki强调好严，特别重视囝囝要有礼貌，「冇礼貌去到边都唔得，佢知屋企有工人姐姐，都要去讲多谢、唔该，要执返自己嘅嘢，仲有望住人对眼打招呼，讲嘢唔可以郁嚟郁去。」Niki坦言唔担心囝囝的学业，但要佢早啲学识做个好人，「写字迟早都会识，但坏习惯好难纠正返。」另外教仔亦不会假手于长辈或工人姐姐，「家庭教育系父母，即系我身上，呢个角色系我制造出嚟，负返责任，我系好enjoy呢个角色。」她坦认因为老公要求故未有公开囝囝样貌，亦不想将来被囝囝埋怨，「等佢识得分先，自己post，我唔会阻止，但唔想未问过佢就摆出嚟，可能佢第时会怪我，唔想做啲嘢令自己后悔。」

去年母亲节Morris除了送花，还唱了首歌送给Niki。

去年Morris生日会，甜爆锡锡妈妈。

Niki笑指囝囝好口疏，「佢返学校会将屋企啲嘢讲晒出嚟，哈哈！」

一秒笑喊遗传演戏细胞

从Niki公开的唔见样照片，可见下月才足4岁的Morris相当高大，「佢未够4岁，好似6岁咁高。」Niki笑言有家族优良遗传，而且跟家姐周汶锜的两个囝囝似样，而性格就跟凑大他的婆婆最似，「我妈妈系上海人，好多嘢讲，阿仔识讲啲上海话，又系好多嘢讲。」另外，性格开朗的Morris是「问题儿童」，「佢系happy baby，好多嘢问，好多都唔识答，问到我有时怀疑自己，佢问我『太阳去咗边度瞓觉』哈哈！好得意，佢知道月亮喺第2个星球嚟，又锺意睇科学嘢，话想做太空人，可能要报啲科学班畀佢。」Morris更遗传了父母的演戏细胞，「佢好drama㗎！一秒钟爆喊，一秒钟嘻嘻笑，唔做戏嘥晒。」听到妈咪要外出，Morris更会狂讲甜言蜜语𠱁妈咪留低，「佢会话『你唔好去啦！你陪吓我啦！你去边啫！你唔好返工啦！』我话我唔返工你养我呀？佢又话『我养你罗！我都可以去返工，等我大个啲，食多啲饭就可以养你』。」（其实几冧㗎？）系㗎！但系讲之嘛！哈哈！我即刻好理性咁话『等你大个啲先啦』。」

Niki指Morris较同龄小朋友高，「医生话高过标准好多。」

Niki称Morris跟周汶锜两个囝囝最似样。

Morris好照顾婆婆，「佢话婆婆老，出街要拖实，又帮佢同工人姐姐做翻译。」

5月18日是Morris生日，因跟母亲节相近，每年都会一齐庆祝，Niki更趁机教囝囝要锡妈咪多啲，「同佢讲『你生日其实都关妈妈事，因为喺我个肚攞你出嚟』我有畀佢睇个疤，佢知道会好心痛，会问我『你痛唔痛㗎？我帮你呵呵佢啦！』我话『所以你要乖啲罗！你生日都系我好痛嘅日子，所以都要同我庆祝㗎！』后尾佢就话『好啦！我同你一齐切蛋糕啦！」Morris要求今年生日会再以英雄人物为主题，不过原来他从未睇过相关电影，「Marvel系列嗰啲英雄佢全部都锺意，但佢未睇过，全部都系我讲畀佢听，佢锺意睇书，未畀佢睇戏同平板电脑，电视睇指定儿童节目，每日半个钟，佢好珍惜嗰半个钟，但系我知唔可以维持好耐，做得几多得几多罗！」