P1X3L千辛萬苦先開騷自嘲：搶到啲咩返嚟？爆笑重提出道被睇死又搶MIRROR資源丨獨家

2024-05-25 07:00

由吳啟洋（Phoebus）歐鎮灝（George）及葉振弘（Marco）組成的P1X3L，成軍3年終在月底舉行首個演唱會，前兩者會增磅操肌做準備。重提入行初期不被睇好，更被指會搶MIRROR資源，甚至被睇少冇資格組男團，重提舊事三人爆笑回應，玩自嘲更反問大家，「我哋搶到啲咩返嚟？」採訪：杜杜攝影：譚志光場地:iza\'bis by city\'super

P1X3L演唱會除合體演出，當然亦有Solo表演。

Marco堅持帶黑超訪問，被隊友「尊稱」godfather。

P1X3L好重視苦等3年的機會，Phoebus指Rundown會以隊名串連，「有時都惆悵做演員又唱歌，究竟邊個先係我哋呀？！呢個正係P1X3L特色，就係冇咁多限制。」P1X3L跟大隊開騷前努力操肌，但對於晒成果，George就落定閘，「冇刻意準備，人哋諗起P1X3L唔會諗起肌肉先。」Phoebus笑着補充，「我哋有肌肉擔當！」Marco即認頭，「我會騷前臂！」George有跟公司提議搵健身教練幫手，Marco火速舉手，「健身教練就係我嘞！」兩隊員即擰歪面以示不滿。Phoebus已進行事無忌憚食增磅計劃，目標增20磅，Marco爆料，「佢想變金鐘國。」Phoebus笑說：「又唔使去到金鐘國咁，除衫啲人話瘦，希望有啲唔同。」George同樣想增磅，「年頭拍電影時好瘦好削，主要想練手臂，最緊要望落厚實着衫好睇啲。」

P1X3L視上月舉行的《P1X3L 5G On Stage!》為熱身。

Marco成為Phoebus和George健身教練。

花姐契仔George狂笑

2021年1月，P1X3L成軍後首次接受本報訪問，當時他們不被外界睇好，更被力數4大不應該成軍的理由。相隔3年重提舊事，3子表現興奮更逐點回應。對於知名度不足，Marco答得老實，「依家知名度都不足！」由於電視台工作較多，George經常忘記歌手身份，「突然間醒起，聽日要上Chill Club唱歌喎！依家心態好啲，捉到既係演員亦係歌手方向。」Phoebus就從沒忘記歌手身份，只是不適應，「通完頂30幾個鐘，再去新城頒獎禮，初出道未習慣。」

2021年1月，初出道的P1X3L受訪，相處模式冇變，互窒又互補。

P1X3L出道前拍攝的首個綜藝《大海男兒》。

另外講到搶MIRROR資源，3人即狂笑反應勁大，George笑說：「𠵱家大家睇到我哋冇搶，搶到啲咩返嚟？今日仲要係姜濤誕（訪問當日姜濤生日）。」訪問地點在銅鑼灣，Marco即講笑：「死啦！對唔住呀！路過咋！」當年被封花姐契仔的George曾經好大壓力，家陣笑得勁開心，「冇啦！𠵱家我哋都冇阿媽！」Phoebus更寸隊友：「佢覺得真係會搶到資源，哈哈！」至於形象不夠鮮明，Phoebus表示已有進步，「你睇佢（戴着黑超的Marco）一表人才。」George搭嘴：「成個教父，godfather！最緊要我哋好清晰想畀啲乜觀眾睇。」最後係冇觀眾緣，3人覺得Hater已較初出道時減少，Phoebus說：「七師父之後，我哋都不斷收到好嘅說話，好多謝大家！」而被指偶包重的他亦放鬆了，「我係好在意觀眾點睇自己，有啲嘢唔透過人哋眼睛或者說話唔會知。」

2021年1月，P1X3L推出第1首單曲《Braceless》。

P1X3L認為獎項有很大鼓勵，感恩出道以來都有獎攞。

Marco被回力鏢擊中

當年訪問，George認為廣東歌及新一輩歌手開始抬頭，希望P1X3L亦能佔一席位，更懇求「聽姜濤嘅歌之外，都可以聽吓P1X3L啲歌。」隊友即起哄，Phoebus笑言：「口出狂言！」Marco就大笑：「以前咁有型咩，好正喎！」George認為目標未達到，但不會放棄，「唔多人聽唔緊要，下首作品再做好啲，做到有人聽為止！」而Marco就話識彈琴，會嘗試寫歌，不過3年後，仍未有作品面世，他即時「嘩！」出聲，隊友輪住幫拖，Phoebus問，「使唔使幫你換位？！」George就教點答，「你話寫緊，仲搵緊靈感啦！」Marco選擇勇敢面對，「真係太愧疚，不瞞大家完全冇喺呢方面鑽研過，亦冇pick up返鋼琴，未來可能會作曲，鋼琴就有陰影，細個成日比賽，壓力大到諗返起都驚。」問到目標？3子希望可創作歌曲。