向展鵬首揭跟車婉婉恩怨始末：佢個人好差《中音2》輸唔起暈低7次撞到面癱丨獨家

2024-06-05 07:00

去年11月，《中年好聲音2》60強止步的向氏家族後人向展鵬（Jeffrey）因在謝師宴上被車婉婉無禮頂撞，嬲到離場，之後返家飲酒兼出PO發洩。雖時隔半年怒火已熄，但仍然缺席「中2生」畢業晚宴。Jeffrey首揭屈埋喺心半年的不快，強調唔啱自己嘅地方就唔會再去，自己搞私人Party唱吓歌仲happy。採訪：方騫平攝影：鄧國良場地：Gentry club

向展鵬話𠵱家要有形象，最緊要唔好影到有肚腩。

為免酒後講錯嘢，訪問當天堅持只飲汽水。

暈時半邊身會突然冇力。

向展鵬於《中音2》後暈低7次，撞到面癱。

打後向展鵬搞咗場迷你音樂會，可以自己話事。

Jeffrey跟車婉婉恩怨由謝師宴當晚講起。

去年Jeffrey花了4個月時間籌備參加《中音2》，豈料60強已被foul出局，跟預算能打入20強有落差，坦言輸唔起更有後遺症：「當晚返屋企飲咗酒跣親，跌到膊頭、膝頭半邊身都爆晒缸。」自此他分別於唔同時間暈倒7次，「暈時半邊身會突然冇力，所以唔能夠用手撐住落地，搞到右邊面撞落雲石地面，𠵱家仲有啲麻痺，但體驗報告一切正常，醫生估計係壓力太大引起，所以冇藥食。」

Jeffrey參加「中2生」60強止步，自言好失望。

Jeffrey因為暈咗7次，帶埋3個名牌包包入院做身體驗查。

抽血檢查。

長輩勸告勿參加《中音2》

至今Jeffrey對被淘汰仍然耿耿於懷，「當晚我的確係喉嚨唔舒服，唱得唔係幾好，但都有3盞燈呀，唔明4燈嘅黃劍文點解唔揀得2盞燈嗰啲，可能佢見我面青口唇白啩！唉！命運注定贏就贏，輸就輸，事後啲出局參賽者，話要搵我傾訴畀我婉拒咗，大家都係唔開心嘅輸家，唔通攬住喊咩。」

Jeffrey歌喉唔錯。

最後被黃劍文揀他出局。

之後Jeffrey有參與9月份生日會及11月份的謝師宴，直至近期的「中2生」畢業晚宴就唔見影，他坦言去完謝師宴發生「車婉婉事件」後，紅塵已被他看破，覺得唔啱玩就唔會再去，更語帶相關舉例：「我經常望到樓下個寵物友善花園有小朋友跌親，或者被狗咬，有過唔好經歷，佢哋都唔會再去嗰個公園啦。」語畢他補充：「但唔好投射狗係邊個？邊個被狗咬？只係舉例。」Jeffrey坦言由始至終家人、朋友、長輩個個都反對他參賽：「佢哋次次都會話『向公子你都傻嘅，你有自己嘅世界，唔應該去嗰度囉，唔啱你㗎，你會後悔！』其實我只係覺得唔啱玩啫，亦都冇後悔，最重要享受過程，佢哋係長輩，年紀大啲再看破紅塵多啲，咁講係想保護我，知我一定會撞板及唔開心，好似坐渡海小輪都分上下層啦，我唔會坐下層。所以我打後搞咗場迷你音樂會，可以自己話事，唔使人認同我。」

Jeffrey覺得唔啱玩，缺席「中2生」畢業晚宴。

去年11月的謝師宴合照中，Jeffrey(二排右1)同車婉婉(二排右4)只係相隔兩個人位。

謝師宴上重遇舊戰友。

Jeffrey跟安雅希、黃劍文等都有偈傾。

當晚Jeffrey同肥媽相認。

車婉婉、吳大強、肥媽等喺謝師宴上現身。

飲咗酒憤怒升級爆出嚟

談到跟車婉婉的過節，Jeffrey由謝師宴當晚講起：「其實我唔想去，但安雅希畀埋我份錢，當晚我冇乜飲酒，見認識肥媽多年，參賽期間又冇機會交談，咪趁機相認，後來車婉婉出現，佢講嘢直腸直肚，加上現場太嘈雜，佢又大聲，講嘢又倔，感覺佢好無禮貌個人好差。當時吳大強讓位畀我同肥媽相認，佢（車婉婉）後來加入，我仲好gentleman咁讓返個位畀佢，然後同佢講『我哋係曾路得度相識，仲同洪天明一齊大食會！』佢竟然答『相識啲乜？吓？大食會，成日都會㗎啦！』佢講得又大聲又粗魯，講完就用背脊『得』住我，當時有好多人望住，我真係唔慣喺啲唔熟嘅人面前被落面，於是唔出聲行開，好唔開心。其實佢冇飲酒一定知發生咗乜事，只係扮唔記得啫。」

向展鵬被車婉婉無禮頂撞，嬲咗半年。

出Po的車婉婉演唱會海報，由Jeffrey下屬負責Blur咗個樣。

婉婉演唱會海報。

Jeffrey飲咗酒會容易控制唔到自己。

向展鵬最愛飲酒。

坐飛機都不忘飲香檳。

向展鵬有唔少靚酒。

然後Jeffrey返到屋企飲咗酒就出咗個po，插女方扮嘢又寸。「咪飲咗酒出事囉，酒後會將啲未消化嘅嬲怒發洩出嚟，所以今次訪問我只飲汽水，哈！不過，瞓醒我經已馬上del po，我同婉婉根本冇乜事，呢啲誤會成日都會發生，都同佢講返聲『唔好意思』。」另外，參賽後Jeffrey推咗唔少Job，他笑說：「60強止步都算係咁啦，未來有機會開公司自資出碟，既然畀得起，咪做自己鍾意嘅嘢囉，都係保險以外唔同嘅嘗試。」