《全職乖孫》各位老人家唔該愛自己多啲丨頭條戲場

故事發生在一個泰籍華人家庭，一事無成只識打機的明仔（Billkin 飾），知道讀醫護的堂妹小梅(Tu飾)因為貼身照顧病重富貴阿爺獲巨額遺產，聽到獨居婆婆(Taew飾)患末期肺癌，即萌生貪念，由點叫都唔肯探吓阿婆，秒執好行李搬去同阿婆住方便照顧，你知我知單眼佬都知，阿婆食鹽多過你食米梗係乜都知。電影屬泰式非煽情類溫情小品，難得講親情但唔算太多夾硬谷你喊橋段，婆孫互動好搞笑，因為個孫好懶，做嘢又Hea，叫佢煲水就咁裝碗水放入微波爐叮熱佢，無限激死阿婆，大量過癮吹脹笑位。(剛上映) 撰文:廖思慧

電影剛上映。

Hea爆明仔因為太Hea，不斷激嬲阿婆，更被阿婆踢走，繼承遺產之路波折重重，惟有向堂妹請教，學吓點樣幫老人家按摩，點樣陪去覆診，管接管送，慢慢由激Hea變認真，阿婆看在眼裡終於識笑，同時間明仔心態亦有所變化。

佢係堂妹小梅，即係泰版《流星花園》女主角。

明仔努力𠱁阿婆開心。

明仔陪阿婆開檔買粥，一聽到要凌晨4點起身扁晒嘴。

堂妹教明仔如何極速令自己加分，如幫阿婆按摩。

又笑又嬲又想喊
因為相處日久，明仔發現繼承之路還要跟兩個舅父競爭，贏面極少，但明仔由緊張變得無所謂，更開始同情及心痛婆婆的孤單，討厭眼中只有老婆及囡囡，每周家庭聚會急急腳走，又呢又路超多藉口的大舅父，超討厭較他更一事無成又周身債兼手腳唔乾淨的細舅父，然後明仔發現媽媽最辛勞，但最得唔到婆婆嘅愛，該死的重男輕女，如果有十大屋企人最乞人僧行為排行榜，兩位舅父的排名絕對是冠亞之爭。

明仔用微波爐叮水放神枱，阿婆嬲到大叫。

每年清明，大舅父老婆都唔去拜山，阿婆即鬧一年一次都唔去。

大舅眼中只有老婆仔女，乜都阿女要點老婆要點，好討厭。

細舅父又懶又大話又爭人周身債，但婆婆最錫佢。

明仔阿媽，日做夜做又要帶婆婆去做物理治療，但婆婆眼中冇佢。

阿婆同仔女每周食飯傾吓偈，但兩個仔一個女永遠都會鬧交。

結局會難過，睇戲當晚座位附近有好多開紙巾袋的聲音，但我還好，因為可以好好道別其實係一件好幸福嘅事，希望所有老人家都能愛自己多啲。全片冇任何狗血劇情，情節亦唔算起伏，睇完會諗起已離世的婆婆嫲嫲，心裡祝佢哋安好。睇完戲Search演員名單，原來男主角是泰國歌影視男神，首擔任電影男一，為配合角色更努力減去22磅，甚至為獲得角色，試鏡前上了半年演員課程。另外，飾演阿婆的Taew更是第一次拍戲，難以置信。

明仔同阿婆相處日久終於覺悟。

由即日起至6月20日，只要參加「市民對特區政府滿意度調查」問卷，即有機會贏取Panasonic護髮風筒、Casetify充電器、大家樂$50餐飲券等豐富禮品。即點擊https://bit.ly/4csd4qL

緊貼最新最快新聞資訊，請立即下載星島頭條App：https://bit.ly/3Q29Vow