《全职乖孙》各位老人家唔该爱自己多啲丨头条戏场

故事发生在一个泰籍华人家庭，一事无成只识打机的明仔（Billkin 饰），知道读医护的堂妹小梅(Tu饰)因为贴身照顾病重富贵阿爷获巨额遗产，听到独居婆婆(Taew饰)患末期肺癌，即萌生贪念，由点叫都唔肯探吓阿婆，秒执好行李搬去同阿婆住方便照顾，你知我知单眼佬都知，阿婆食盐多过你食米梗系乜都知。电影属泰式非煽情类温情小品，难得讲亲情但唔算太多夹硬谷你喊桥段，婆孙互动好搞笑，因为个孙好懒，做嘢又Hea，叫佢煲水就咁装碗水放入微波炉叮热佢，无限激死阿婆，大量过瘾吹胀笑位。(刚上映) 撰文:廖思慧

电影刚上映。

Hea爆明仔因为太Hea，不断激嬲阿婆，更被阿婆踢走，继承遗产之路波折重重，惟有向堂妹请教，学吓点样帮老人家按摩，点样陪去覆诊，管接管送，慢慢由激Hea变认真，阿婆看在眼里终于识笑，同时间明仔心态亦有所变化。

佢系堂妹小梅，即系泰版《流星花园》女主角。

明仔努力𠱁阿婆开心。

明仔陪阿婆开档买粥，一听到要凌晨4点起身扁晒嘴。

堂妹教明仔如何极速令自己加分，如帮阿婆按摩。

又笑又嬲又想喊
因为相处日久，明仔发现继承之路还要跟两个舅父竞争，赢面极少，但明仔由紧张变得无所谓，更开始同情及心痛婆婆的孤单，讨厌眼中只有老婆及囡囡，每周家庭聚会急急脚走，又呢又路超多藉口的大舅父，超讨厌较他更一事无成又周身债兼手脚唔乾净的细舅父，然后明仔发现妈妈最辛劳，但最得唔到婆婆嘅爱，该死的重男轻女，如果有十大屋企人最乞人僧行为排行榜，两位舅父的排名绝对是冠亚之争。

明仔用微波炉叮水放神枱，阿婆嬲到大叫。

每年清明，大舅父老婆都唔去拜山，阿婆即闹一年一次都唔去。

大舅眼中只有老婆仔女，乜都阿女要点老婆要点，好讨厌。

细舅父又懒又大话又争人周身债，但婆婆最锡佢。

明仔阿妈，日做夜做又要带婆婆去做物理治疗，但婆婆眼中冇佢。

阿婆同仔女每周食饭倾吓偈，但两个仔一个女永远都会闹交。

结局会难过，睇戏当晚座位附近有好多开纸巾袋的声音，但我还好，因为可以好好道别其实系一件好幸福嘅事，希望所有老人家都能爱自己多啲。全片冇任何狗血剧情，情节亦唔算起伏，睇完会谂起已离世的婆婆嫲嫲，心里祝佢哋安好。睇完戏Search演员名单，原来男主角是泰国歌影视男神，首担任电影男一，为配合角色更努力减去22磅，甚至为获得角色，试镜前上了半年演员课程。另外，饰演阿婆的Taew更是第一次拍戏，难以置信。

明仔同阿婆相处日久终于觉悟。

由即日起至6月20日，只要参加「市民对特区政府满意度调查」问卷，即有机会赢取Panasonic护发风筒、Casetify充电器、大家乐$50餐饮券等丰富礼品。即点击https://bit.ly/4csd4qL

紧贴最新最快新闻资讯，请立即下载星岛头条App：https://bit.ly/3Q29Vow