44歲Amanda S.拒做醫美公開零老態秘訣離婚10年錯過生B時機唔恨再婚丨獨家

2024-07-11 07:00

Amanda S.相隔16年再拍電影《海關戰線》，首演反派軍火商「Dr. Raw」的她大呼好玩，仲話廣東話叻咗，對演戲更有信心，坦言「講廣東話對白及睇中文劇本完全無問題」，各位導演可以留意返。年屆44歲，離婚10年的Amanda狀態仍然極佳，不過她認為已錯過生B最佳時機，冇諗過再組織家庭，拍拖開心最緊要。採訪：杜杜攝影：朱偉彥

Amanda希望有更多演戲機會，強調講廣東話同國語都無問題。

Amanda上一部電影是2008年《十分鍾情》單元《最後一口價》，坦言出道時好多戲拍，但之後經常不在港致錯失大量機會。她在《海關》首演反派軍火商「Dr. Raw」好興奮，「平時我都係做啲好乖嘅女仔，做Big Boss好神奇，做反派做到啲人鍾意有啲難度，呢個反派好好玩。」貴為名模的她又讚角色造型夠特別，「食雪茄，着好靚嘅衫，戴珠寶，又有太陽眼鏡，試身時都幾開心，皮褲都有3個色，好高貴。」

2001年，Amanda拍攝首部電影《願望樹》與陳冠希合作。

Amanda在《海關戰線》演反派軍火商「Dr. Raw」。

Amanda出席《海關戰線》香港首映禮。

見到霆鋒有壓力

Amanda由2017年開始，經常以甜品師身份跟謝霆鋒合作，但在《海關》是首次在電影上合作，雖然兩人沒對手戲，但因霆鋒的動作指導身份令她好緊張，「導演同埋指導啲mon喺比較遠，有次我拍完，霆鋒突然行出嚟，佢喺度我會緊張啲，好彩我唔知佢喺度會好啲。佢又咁識做戲，知道佢喺度睇有壓力，同埋霆鋒對自己及其他人要求都好高。」

Amanda跟霆鋒曾在美食活動上合作多次。

日前Amanda跟霆鋒等人到內地i為《海關戰線》謝票。

日前Amanda跟霆鋒等人到內地為《海關戰線》謝票。

在戲中，Amanda講全英語對白，拍攝較以往輕鬆，她坦認語言阻礙了圈中發展，「啲人唔知我可以講國語、講廣東話，初初我拍戲時，我啲對白都係用國語講，跟住再用VO。」她認為現在廣東話有進步，有信心講中文對白演戲，「香港人成日同我講聽多啲講多啲，係真嘅，電話可以聽電台，我會聽埋，廣東話嘅語音訊息，我聽係冇問題。」她笑言睇中文劇本亦冇問題，「有Google translate，哈哈！」她又指初來香港做電視節目都勇敢講廣東話，唔驚失敗，「我唔驚做錯，以前做訪問成日都講錯嘢，隔籬嗰個話錯呀，哈哈！多謝你哋成日提我，唔係咁嘅意思要再講，多謝大家畀機會。」

Amanda認為現在選擇工作和愛情，都要開心為目標。

2018年，Amanda父親患病離世，令她重新審視人生。

冇做媽媽嘅緣份

Amanda曾於2015年開設法式甜品店「Petite Amanda」，2020年再於中環開設Pop-Up餅店，她表示暫時無意再搞生意，「好鍾意做甜品，疫情嗰時開過pop-up，但個廚房唔係我，嗰時搵廚房好容易，𠵱家搵就難，同埋要搵到個好拍檔先，要識得營運，因為我做生意唔係特別叻，但我可以諗啲口味出嚟。」

2014年，Amanda在銅鑼灣開設首間餅店「Petite Amanda」。

44歲的Amanda依然keep得好好，她笑言花很多心機保養，「最緊要皮膚靚，一定要好乾淨好保濕，又好鍾意做mask，又會去美容院，都有針灸嗰啲。」不過她寧願優雅地老去，拒絕做醫美，又努力做運動維持體重在50kg，偶然容許55kg，「畀空間自己開心，都要愛自己。我係keep住郁，不停做運動，游水、室內踩單車、健身、行山，仲好鍾意滑水。」加上她先天條件呃到人，「我塊面特別瘦，肥喺pat pat位。」

Amanda愛玩戶外運動，包括滑水。

為食的Amanda，靠狂做運動維持體態。

2014年跟意大利籍丈夫Christian結束3年婚姻，Amanda之後亦傳有新戀情。問到感情狀況，她用「開心」來形容，「我𠵱家拍拖嘅好處，係唔會為生小朋友，最緊要搵到個人對我好，有愛情。」她稱10年前有諗過生BB，但現在已放低，「呢個唔係我嘅緣份，生小朋友好容易，但係要有個家庭，要搵個啱嘅人一齊生，要嘥好多心機同時間照顧小朋友，嗰時離婚冇再結婚，就放棄！」