陳德森因投資者輕生家人中風患癌致情緒病！求醫更抑鬱：講咁多都未入題，我已經唔見咗3千丨專訪
2024-07-24 10:00 
「金像導演」陳德森（Teddy）的從影之路絕對可媲美他的電影作品，因被徐小明睇中成為特約演員，其後加入麗的電視編劇組成為編劇，轉個頭又做了成龍大哥的第一個助手，但很快又向成龍請辭，決心追尋導演夢，多年來拍過不少叫好叫座的電影。不過陳德森兩度受抑鬱症煎熬，令人生陷入前所未有的困局，最後陳德森選擇自我心理治療，終於走出死蔭幽谷。陳德森在64歲生日的時候，推出自傳《把悲傷留給電影》，並透露今年有一個新計劃，將進軍YouTube界成為KOL。
相關閱讀：成龍與陳德森斷交20年因為兩個字：冇佢就冇今日嘅我
陳德森兩度受抑鬱症煎熬：
自傳《把悲傷留給電影》記錄了不少陳德森的故事，當中有部份情節曲折離奇，正如陳德森所言：「前半生如戲，後半生戲如人生。」日前陳德森在尖沙咀接受《星島頭條》的訪問，他透露已經計劃推出第二本新書：「下一本書叫《他她它和祂》，我呢生遇到好多神奇嘅人，有超能力嘅人，有神通嘅人。我成日都講，勸人做多啲善事，雖然我係一個佛教徒，有啲人一唔好就會走去算命，幾犀利嘅神算，算到好多唔好嘅嘢，要小心啲乜嘢。算到你嘅壽緣去到幾多，但如果你做多啲善事，你嘅人生同命運係會改變，可能我信呢樣嘢，每到一個時候，有啲困難，去到低谷嘅時候，就會有呢個人出現，真係好奇怪。」
《把悲傷留給電影》收益全做善事
同一時間，陳德森今次亦有新構思：「我本身有好多電影劇本未拍，所以不如先寫成電影小說，如果到時有人睇中想改篇，咁咪多一條出路。我一直都唔識得敲門，喺電影最煇煌嘅時候，我係最懶，我係重質不重量，起碼我今生冇後悔，拍得唔好係我問題，但係我係製作認真。如果製作費係偏少，我唔介意搵啲同我啱傾嘅新導演出嚟，我做監製，而家後生拍戲做得好好，好多鏡頭同畫面仲拍得好過我，我冇呢方面嘅觀念，好多鏡頭嘢都交俾攝影師，我就拍人拍戲。」除此之外，陳德森亦計劃進軍YouTube行列，找來身邊的朋友分享對抑鬱症的所見所聞。
陳德森求醫反令抑鬱症更嚴重？
陳德森在2003年籌備電影《十月圍城》時一波三折，除了主角難尋，拍攝時還碰到SARS停工，其後又因投資者輕生令資金被凍結，母親在澳洲探親時中風昏迷，胞姊同一時間患癌症，接二連三的突發事，令到陳德森身心無法承擔而患上抑鬱症，到了2009年，《十月》再度開拍，再因沉重的壓力令抑鬱復發。對於當年的經歷，陳德森說：「我最嚴重嘅時候，應該係第一次，有人介紹咗個心理醫生畀我，應該係全香港最貴同最好嗰三個，睇一次差唔多要9000蚊，佢好似畀咗9折。嗰陣佢嘅辦公枱後面有個大鐘，枱面有一個計時器，醫生問我叫陳導演、導演、陳德森定Teddy好啲，我話冇所謂，仲話可以瞓喺梳化同佢傾偈，最緊要係舒服，跟住又話不如由有記憶嗰陣開始講，我咪話唔睇，佢問我乜嘢原因，我咪話望住大鐘過咗15分鐘，你講咁多嘢都未入題，我已經唔見咗3000蚊，我嘅抑鬱症更加嚴重，佢最後都有開藥畀我，但係我話食唔食自己決定，跟住個醫生走咗，我食咗2日，係要完全令你唔諗嘢，個人high high哋，我覺得唔啱自己，係唔食得。」
陳德森受成長經歷影響
回望人生，陳德森坦言成長經歷對他有很大影響：「其實我自己唔係幾好，成日賴咗爸爸媽媽，但係我覺得實際係有影響，係童年陰影，我一直都唔係好信家庭同婚姻呢件事，包括20幾歲啲朋友結婚，10對先得一對非常好，有一對各有各精彩，係為咗細路仔先一齊，有7、8對都係分開。到咗做導演，我係一個隨緣嘅人，唔係唔積極，只係有好嘅題材先會拍，呢行好老闆又可遇不可求，變咗嗰個生活好平淡，自己一個人又好安穩。如果我自己有家庭，要好好負起呢個責任，起碼都要供佢讀大學，呢啲係最傳統同基本觀念，但係我覺得照顧唔到自己，點去有個家庭？」他續說：「我自己一個人，唔鍾意嘅戲可以唔接，人生到咗年紀大，就係簡減化，朋友都係，唔好嬲一個人，佢都有佢嘅問題，佢都有佢嘅環境，咪唔來往囉，大家路不同不為謀，我都唔會嬲你。以前後生唔係，我同你咁好，我哋16歲就識，後生一齊去尖沙咀媾女，大家創作又互相幫忙，到而家唔對我？人生乜嘢都係減化，年紀大冇咁多精力。」笑問有不少90年代導演都是早年結婚，離婚後到晚年再娶另一個，陳德森笑說：「咁又唔係，有啲都有好好，好似陳可辛，林超賢都好好，可能有啲走咗去內地，小朋友因為讀書問題，多數都留喺香港，變咗一分隔兩地，好自然會出問題。當年好多人喺97年移民加拿大，有啲人嘅婚姻都有出現問題，只要一喺兩地，就會有問題。」
三級片《晚九朝五》當年上映惹爭議：
陳德森：電影令到我有抑鬱症
經過漫長又痛苦的非人生活後，陳德森在宗教信仰影響下學懂了4句話：「面對它，接受它，處理它，放下它。」陳德森更發現原來抑鬱症係來自公司，他說：「因為疫情，傾啲嘢都傾唔掂，冇收入，同事又跟我好多年，嗰陣疫情又難搵工，咪諗住頂得幾耐得幾耐，但係到後期係頂唔住，最後解散咗間公司，問題亦relese咗。」對於目前的人生，陳德森說：「我同自己講，所有嘢都要有happy ending，唔要有負面，要話畀全世界知，明天會有希望。而家冇咁執着，以前成也電影，敗也電影。除咗拍電影，我11點零返到公司搞行政嘢，中午約電影人食飯，下畫約人食飯傾劇本，HAPPY HOUR都係同電影人，食飯邊爐都係同幾個監製導演，就算夜晚唱歌都可能同啲演員，我係離唔開電影，電影令到我開心，攞獎又票房好，唔開心又係因為電影，好似人生冇第二樣嘢，亦都係電影令到我有抑鬱症。」
陳德森：人生不可沒電影，但不可只得電影
陳德森續說：「我知道個問題喺邊度，我嘅人生唔可以冇咗電影，但唔可以只係得電影，所以咪開始有宗教信仰，好似起廟呀，修廟、修路呀，慢慢咪做慈善嘅嘢，做咗慈善老人院同老人服中心，咁個心入面咪唔係得電影，如果你做得唔好，好難喺下一個創作度好頹，可能會越搞越頹，成班電影人坐度飲酒，係解決唔到問題，最多係慰藉下。我而家叫人捐錢，可能失去咗好多朋友，經濟唔好可能好煩，咁我咪幫慈事機構拍嘢，幫手推介下佢哋，全世界都可以睇到，我而家已經跳出咗開心程度，係覺得應該去做，我拍電影唔工作嘅時候，度橋做下呢樣嘢，亦不停RUN我嘅技術，我嘅人生多咗一個選擇同生活方式。」
陳德森執導電影《晚九朝五》曾惹爭議
看見陳德森，不得不提他在1994年執導的電影《晚九朝五》，當時上映已經惹來很大爭議，他說：「主要係一寫三級，就唔係暴力就係色情，但係我呢個三級係講好真實嘅SEX，一夜情，濫交多角戀，呢啲人冇明天冇乜希望，聚焦喺一齊，但係我冇批判呢件事，你去選擇你嘅生活，最後都係有人結婚。」陳德森直言當時「係好驚」：「好似《色情男女》入面嘅張國榮，佢係拍唔到藝術片走去拍三級片，呢個咪係我嚟，我日日匿喺度，見到女主角喊，好似賣人落火坑。」笑問這經歷被當為藍本？陳德森說：「咁我又唔知，但係當時係有人搵我做徐錦江個角色，要我背部全裸，後尾諗諗吓唔得，真係架，嗰陣我哋成班導演嘅關係好好，成日好多嘢都互相交流。」
攝影：譚志光
其他文章：
最新回應