《異形：羅穆盧斯》歡迎師兄弟歸位丨頭條戲場

電影在港上映兩周收逾2,000萬票房，見好多人問一套《異形》都冇睇過，會唔會睇唔明？一次過答晒你哋，雖然戲中有好多向舊作嘅致敬位，但《羅穆盧斯》劇情好完整，就算你連異形有口中口都唔知，都唔會影響觀影體驗，當佢太空喪屍片咁睇就得㗎嘞。點名讚好《禁室殺戮》導演兼編劇Fede Alvarez，用最拿手嘅密室恐怖片手法去拍《羅穆盧斯》，全片在太空船不斷逃亡逃亡逃亡再殺呀殺呀殺呀匿埋再反擊，然後有人死再不斷Loop，最後智取異形，精彩到癲，寫寫吓又想睇多次。(上映中) 撰文:廖思慧
 

異形擘大個口又隊到咁埋，致敬位之一。

生化人及礦工成功潛入廢棄太空站，場景又係好熟悉。

導演Fede Alvarez有幾勁?2016年的《禁室殺戮》開拍成本900萬美元，最後全球大收1.57億美元(約12億港元)，用指甲鉗鉗咗個大森林出嚟，巨癲。而導演拍《羅穆盧斯》亦好有要求，堅持實景拍攝，綠幕特效只佔極少數，甚至連實體異形都整咗好多款出嚟。當中有8呎高好瘦的全機械玩偶版異形，另一個尺寸相同但重量更輕，可一人控制做出更快速的動作。另外亦有兩個機械異形頭，黐喺特技替身件衫上，每個實體道具都製作得細緻又逼真。

頂尖特效公司做出嚟嘅8呎高實體異形。

每個實體道具都製作得細緻又逼真。

每個實體道具都製作得細緻又逼真。

新異形好過癮
電影時間線設定於《異形》及《異形2》之間，重要角色包括威尼斯影后Cailee Spaeny飾演的有腦女主角Rain，而男一就由David Jonsson飾演人造人Andy。因為太空殖民地環境太惡劣，兩人被年輕礦工游說齊移居其他星球，首要做嘅就係闖入廢棄太空站盜取冷凍倉及能源，話事年青人預計30分鐘走得，最後被困異形繁殖基地即稱為「羅穆盧斯」的太空站實驗室。

年輕礦工唔知廢棄太空站已變異形繁殖場，出晒事。

呢隻嘢就係抱面體(Facehugger)。

抱面體(Facehugger)目標唔係攻撃敵人，而係將異形胚胎植入母體。

演員好靚，包括威尼斯影后Cailee Spaeny及飾演Tyler的Archie Renaux。

Rain跟人造人Andy到中後期相依為命，後者係人造人失敗作，冇乜用。

戲中有唔少靜止到突然奔走場面，好緊張。

寂靜太空好Chill

一開場飛船出現加上寂靜太空一幕已睇到毛管戙，有種師兄弟歸位感覺。鍾意電影快速推進，簡單交代背景已經入戲肉，一眾年青角色逐個送頭，亦冇乜豬隊友做蠢事橋段，然後有《異形》的生化人，加上熟悉的黑水及抱面體爆胸，仲有開場冇耐的大肚女角Isabela Merced現身，觀眾都會估到今次有新異形出現。

電影氛圍營造好勁，全程Keep住掩住個口嚟睇，恐怖場面不斷升級，結尾10分鐘最黐線，導演可以將面世45年的恐怖片玩出新花樣，喪。

注入異形基因的「人異怪胎」「Offspring」，由231cm（7呎7吋）前大學籃球員Robert Bobroczkyi飾演。

佢係大肚靚女Isabela Merced，佢嘅動作亦係我睇戲嘅動作。