《异形：罗穆卢斯》欢迎师兄弟归位丨头条戏场

电影在港上映两周收逾2,000万票房，见好多人问一套《异形》都冇睇过，会唔会睇唔明？一次过答晒你哋，虽然戏中有好多向旧作嘅致敬位，但《罗穆卢斯》剧情好完整，就算你连异形有口中口都唔知，都唔会影响观影体验，当佢太空丧尸片咁睇就得㗎嘞。点名赞好《禁室杀戮》导演兼编剧Fede Alvarez，用最拿手嘅密室恐怖片手法去拍《罗穆卢斯》，全片在太空船不断逃亡逃亡逃亡再杀呀杀呀杀呀匿埋再反击，然后有人死再不断Loop，最后智取异形，精彩到癫，写写吓又想睇多次。(上映中) 撰文:廖思慧
 

异形擘大个口又队到咁埋，致敬位之一。

生化人及矿工成功潜入废弃太空站，场景又系好熟悉。

导演Fede Alvarez有几劲?2016年的《禁室杀戮》开拍成本900万美元，最后全球大收1.57亿美元(约12亿港元)，用指甲钳钳咗个大森林出嚟，巨癫。而导演拍《罗穆卢斯》亦好有要求，坚持实景拍摄，绿幕特效只占极少数，甚至连实体异形都整咗好多款出嚟。当中有8尺高好瘦的全机械玩偶版异形，另一个尺寸相同但重量更轻，可一人控制做出更快速的动作。另外亦有两个机械异形头，黐喺特技替身件衫上，每个实体道具都制作得细致又逼真。

顶尖特效公司做出嚟嘅8尺高实体异形。

每个实体道具都制作得细致又逼真。

每个实体道具都制作得细致又逼真。

新异形好过瘾
电影时间线设定于《异形》及《异形2》之间，重要角色包括威尼斯影后Cailee Spaeny饰演的有脑女主角Rain，而男一就由David Jonsson饰演人造人Andy。因为太空殖民地环境太恶劣，两人被年轻矿工游说齐移居其他星球，首要做嘅就系闯入废弃太空站盗取冷冻仓及能源，话事年青人预计30分钟走得，最后被困异形繁殖基地即称为「罗穆卢斯」的太空站实验室。

年轻矿工唔知废弃太空站已变异形繁殖场，出晒事。

呢只嘢就系抱面体(Facehugger)。

抱面体(Facehugger)目标唔系攻撃敌人，而系将异形胚胎植入母体。

演员好靓，包括威尼斯影后Cailee Spaeny及饰演Tyler的Archie Renaux。

Rain跟人造人Andy到中后期相依为命，后者系人造人失败作，冇乜用。

戏中有唔少静止到突然奔走场面，好紧张。

寂静太空好Chill

一开场飞船出现加上寂静太空一幕已睇到毛管戙，有种师兄弟归位感觉。锺意电影快速推进，简单交代背景已经入戏肉，一众年青角色逐个送头，亦冇乜猪队友做蠢事桥段，然后有《异形》的生化人，加上熟悉的黑水及抱面体爆胸，仲有开场冇耐的大肚女角Isabela Merced现身，观众都会估到今次有新异形出现。

电影氛围营造好劲，全程Keep住掩住个口嚟睇，恐怖场面不断升级，结尾10分钟最黐线，导演可以将面世45年的恐怖片玩出新花样，丧。

注入异形基因的「人异怪胎」「Offspring」，由231cm（7尺7寸）前大学篮球员Robert Bobroczkyi饰演。

佢系大肚靓女Isabela Merced，佢嘅动作亦系我睇戏嘅动作。