《破浪男女》逼死人的赤裸純愛故事丨頭條戲場

新聞稿咁寫，「金馬影帝吳慷仁全裸衝擊電檢尺度，屬台灣電影史最大尺度的情色愛情電影。」打晒底入場依然大開眼界，導演楊雅喆為觀眾帶來一齣好有意思、非常有質感兼畫面好靚的情色電影。兩位女主角均有正面全裸場口，吳慷仁就晒冷式露三點兼會同「菊花」有近距離接觸，而香港代表柯煒林就著黑膠衫半裸玩SM，4個人兩段唔真實的關係，有人玩彌補，有人沉迷逃避，歡愉過後又自覺好罪惡又呢又路，人類真係麻鬼煩。(上映中)撰文:廖思慧

小綠同「單親霸」是SP關係，因為性生活好配合，感情較一般SP更好。

白Q活得不快樂，畀錢「Uberdick」縛自己尋求快感。

電影以新時代的愛情觀「約炮」為主題，透過連場大膽性愛場面，如男女、男男、多P、BDSM等探討都市人點解唔拍拖，沉迷「約炮」。兩位女主角分別是30歲的劉主平，首次全裸演出已去到好盡，全片有超過三分一時間都係冇著衫，加上動作場面非常大膽露骨，一幕被吳慷仁吮腳趾及壓軸3P大戰，睇到面都紅埋。另一女角32歲梁湘華更憑電影入圍本屆金馬獎最佳新演員。

吳慷仁露三點，我就覺得嗰幕唔太需要.

小綠有一個秘密，佢唔想「單親霸」知，但其實對方已知。

尺度真係好癲
戲中沉迷SP的小綠(劉主平飾)及閨密白Q(梁湘華飾)只靠短訊聯繫，傾偈內容大部份是至尊色色級別，例如小綠會開心分享「快樂」器官的顏色、狀態，跟SP「單親霸」（吳慷仁飾）相處的點滴，女人講鹹濕嘢講到咁入血認真少見。而白Q是一個零話事權的富二代，父母話乜就乜，當然連老公都唔輪到佢揀，因為寂寞因為凍，選擇付費自虐，從膠衣縛繩師「Uberdick」（柯煒林飾）身上獲得快感。

德國心理治療大師Bert Hellinger曾經講過，「受苦比解決問題容易」，好適合形容佢哋。

「Uberdick」跟女友都是縛繩師，亦有好多問題。

「Uberdick」除咗件膠衫是可憐蟲，女友點踢都唔走。

戲中雖然有大量情色動作場面，但所有歡愉背後都有一種痛，如你抱住純睇肉心態入場，應該會睇到好無力兼無癮。另外片中充斥各種明喻及暗喻，睇唔明都唔使愁，我目標就係柯煒林，佢演得好又操到勁大隻，心滿意足。最欣賞片尾曲「日本佛系音樂家」藥師寺寬邦所演唱的《楞嚴咒》，可以遠離負面詛咒，純淨心靈，相信大家都好需要。

 

導演在戲中將水及浪的意象用得好好。

白Q跟被分配的富二代影婚照，畫面好嘔心。