美股瘋狂消息市 牛三要到來嗎？｜晉佳
2024-11-07 18:03 
美國大選過後，美股錄得單日大升市，而且高開後以大陽燭收市，成交大增。銀行金融股受惠監管放鬆及企業稅下調預期，股價幾乎全線升一成以上，摩通（JPM）、大摩（MS）、高盛（GS）升至少11%。最離奇板塊莫過於監獄股，預期美國擴大私人監獄及移民拘留中心，GEO懲教集團（GEO）及美國懲教公司（CXW）分別狂升42%及29%，Tesla（TSLA）升近15%亦要望塵莫及。
數據方面，小弟紀錄市值5億美元以上、單日成交5,000萬美元以上嘅日線多頭排列美股數目，達到637隻，為今年非四巫日最高水平。即係話畀大家聽，美股非常瘋狂！
投資者大賺，自然帶動財富效應，美股亢奮升市有可能出現。不過，今晚議息當前照計仲有得升，各項大消息喺周四收市正式終結，加上期權好倉平倉活動因為聯儲局議息而延至周五，形成較大獲利盤壓力，所以周五出現調整機會較大，如果周五真係調整，就會成為短線買入機會。
非常瘋狂嘅話，要麼見頂，要麼更加瘋狂。值得留意係，有消息驅動時嘅美股及個股，除咗炒Trump概念之外，業績股升勢亦係一步到位，Tesla（TSLA）、Roblox（RBLX）、Reddit（RDDT）、Palantir（PLTR），績後單日升兩成以上，上期推介嘅Applovin（APP）剛公布業績盤後爆升28%，呢類股只能喺消息前買入博一博，升嘅話根本唔畀你業績後有機會買，一次過爆升。至於另一隻推介股Duolingo（DUOL）不幸績後微跌，兩隻拉勻點都賺。
至於Applovin裂口高開後，仲可以繼續持有嗎，想食糊嘅話，食半留半當然可以，瘋狂嘅市況，唔輕言估頂。
晉佳
相關文章：
關鍵字
最新回應