毅行者丨伍富橋夥吳業坤參加100公里賽事 獲愛妻全面照顧
2024-11-16 22:30 
樂施會毅行者昨日（15日）在西貢北潭涌開跑，主題為「毅行40『堅』並肩」，有超過1,000隊跑手參加，伍富橋（Alvin）和吳業坤（坤哥）組隊的「Peace of Cake」昨早起步，是二人連續第二年結伴參加100公里賽事，同時是大會的「星級毅行者」之一，二人最終以32:53（近33小時）完成毅行者。
伍富橋與吳業坤昨日提早約兩小時到場，伍富橋透露其中一位隊友臨陣「甩底」，賽事前一日才臨時拉夫，邀請另一位有經驗的朋友頂上：「可能我人緣都唔係真係太差，真係尋日先臨時拉夫，confirm到另一位隊員加入我哋。」伍富橋續指新隊友經驗十足，是如虎添翼。伍富橋說：「其實我同佢曾經都玩過一次100km逆走，佢嗰陣時都有陪我哋行，所以我大約都知道佢OK，我都係擔心我哋行得太慢，影響到佢嘅狀態，如果隊友跑得太慢，對跑得快嘅人嚟講都唔係好，即係佢嘅體力會drop得快過正常嘅pacing。」
相關閱讀：伍富橋自認專一絕無偷食 吳業坤減磅比賽講明不可打臉 梁釗峰為慳路程錯失與發哥集郵
伍富橋吳業坤完成毅行者：
吳業坤提到比賽前夕打風又落雨，本身都有點擔憂：「有啲擔憂，自己都未試過（落雨跑山賽），希望都可以順利、無損地完成，因為嚟緊都有啲騷，同埋自己啲歌啱啱出咗，希望可以唔好影響到人，或者唔好影響到自己嘅情況下完成。」吳業坤將於周日（17日）參加機場三跑10公里賽，希望能在28小時內完成賽事，讓他有足夠的時間領取選手包。
伍富橋妻搞流水宴
伍富橋大爆兩位太太在不同的check point做support team，太太又大搞流水宴，讓其他跑手都能享用美食，生果已經有10盤，還有車仔麵和熱飯，希望其他跑手都能開心完成賽事。吳業坤指太太會輔助伍富橋太太，做對方助手：「總之一齊過嚟，始終人手都好需要，冇理由要佢太太一個負擔晒所有嘢」，吳業坤又認為：「總之大家有需要就……又唔係一個要追成績嘅比賽，所以大家最緊要開心、健康、安全就得。」
伍富橋安全至上
伍富橋表示：「『人無事先做到世界冠軍』丫嘛。即係都擔心嘅，我哋so far都好少會咁大雨去行山，之前好多時都係行咗一半先有毛毛雨，但係而家都已經落咗成兩日，啲路都應該比較難行，咁就乜都試吓囉。佢（坤哥）就試過好凍嘅時候行啦。」而吳業坤因為試過行富士山，笑言：「應該係兩個世界嚟嘅，希望我哋四個人都可以齊齊安全到終點。」
伍富橋曾憂打風
對於近日打風又落雨會否忐忑不安？伍富橋直言：「都有㗎，都擔心會⋯⋯好似幾個風都嚟緊，但好彩就係前一日打咗8號，就知道今日應該可以OK，應該未試過連續兩日都打8號，咁就知道應該可以如期舉行。」吳業坤表示：「尋晚臨瞓前都希望尋晚落咁大雨，今日應該冇嘢啦，但都係祈禱失敗，不過唔緊要，我都期待Alvin太太下晝美味嘅補給品，所以呢個就係我嘅動力。」
被問到應對天雨路滑嘅策略？吳業坤準備充足，帶長袖衫及雨褸：「之前冇試過，之前次次都好好天，可能大家真係要準備啲防水嘅風褸，保存個體力同埋體溫，同埋特別準備多咗啲gel、gummies，去keep住個糖分，最緊要係keep到個精神同所有嘢。」
伍富橋做足準備
伍富橋反而擔心濕鞋：「反而係驚對鞋會濕，一濕咗，磨擦多咗就會起水泡，我哋始終都要行成20幾個鐘，都驚隻腳會提早出現水泡，因為我嘅經驗係，每次我三、四個泡都走唔甩，都有啲擔心呢樣嘢，但係冇辦法，我哋都係行，我哋行毅力嘅，OK嘅。」伍富橋續表示：「中途50 km嘅時候可能會換對襪，可能會好啲，下晝應該唔換㗎啦，因為你着開嗰對，你就會唔適應。」
伍富橋戥妻辛苦
被問到早上是否獲得太太打氣？伍富橋笑說：「喺睡夢中打氣囉，唔知你係咪？」吳業坤則晒幸福稱太太有整早餐：「最簡單嗰啲玉子燒加個白飯咁樣，補充體力，最安全。佢（伍富橋）太太好勁，我見佢前日已經準備咗好多，總之乜都有啦。」伍富橋承認太太的準備好豐富：「又有生果盤啊，跟住佢哋嘅飯餸，跟住枱枱凳凳。因為尋日知道會落雨，就特登去買咗把太陽傘，希望我哋嚟到嘅時候，同埋喺佢等我哋嘅時候，唔會淋雨淋濕。其實我覺得平時support已經夠辛苦，等我已經好辛苦，分分鐘等幾個鐘，但今次仲要落住雨等，真係好辛苦。」
伍富橋怕妻苦等
吳業坤補充補給不只預備他們四人，而且是免費，幫助有需要的朋友：「太太唔淨係預備我哋四個人，係預備埋俾其他人，如果真係有需要，都可以過嚟補給。」伍富橋直言預備不少份量：「淨係生果都10盤到，直頭可以做一個check point站，佢個量多到，行埋嚟就放題㗎啦。」伍富橋又讚太太：「係佢自己諗嘅，因為本身我都話會唔會太多，佢冇玩過，但係佢有做過support，佢話可能有啲人真係獨立嘅團體，自己玩，冇support，又可能好少support，嗰啲人見到咪可以過嚟攞，我哋預多啲都冇所謂。」對於check point馬騮偷襲，二人未有太過擔心，認為會趕及補給。伍富橋不忘感謝太太付出：「陪伴都需要，都辛苦，所以今年都叫咗三、四個朋友過嚟陪佢，有個伴傾吓偈，飲番杯又好，點都好，冇理由叫佢哋乾等。」
吳業坤再戰三跑
對於目標，吳業坤稱：「希望二字頭囉，之前keep住都係三字頭，希望今次入到二字頭，（都係想破自己紀錄？）係囉，希望天公做美。」完成賽事後，吳業坤笑說：「再跑多個三跑（10km）慶祝下，不過唔知道攞唔攞到個號碼簿，本身係尋日攞，但取消咗，如果趕得切喺28個鐘跑完，跟住再完成埋啲手續，跑埋個三跑。」吳業坤坦言最近較忙碌，但會盡力：「第一年其實都冇乜練習，我覺得意志係大過一切，而自己本身都有做開運動，但都唔代表係可以輕視，但真係報咗名就盡力而為，喺最安全嘅情況之下做好佢。」而吳業坤之後的賽事，太太會陪他一齊跑。
其他文章：
最新回應