美股業績期隨機爆升之謎｜晉佳

美股市況相當理想，近日凡有業績表現稍為唔錯嘅股份，都會大幅度裂口高開，股價一去冇回頭，假如投資者唔願意承擔業績風險，只能眼見業績後股價大幅高開，然後唔要命高追。AppLovin（APP）、Palantir（PLTR）業績後裂口高開，及後都仲有多四、五成額外升幅，令投資者更樂於追入其他業績後急升股份。

最令人疑惑嘅係，今次業績期內，業績後股價反應變得更為隨機，個別業績好嘅股份，股價績後一樣下跌。以大家最熟悉嘅Tesla及Nvidia為例，之前Tesla收入遜預期而盈利勝預期，非一面倒利好，股價單日爆升22%；Nvidia業績勝預期，績後先升後回，其後連跌多日。

四方面判斷績後股價走勢

經過一段時間嘅觀察，業績後股價會否上升？大概可以睇四方面，第一方面當然睇業績表現有否勝預期；第二方面睇績前嘅市場預期值，以Nvidia為例，就係極端地人人睇好佢份業績，形成績前超買，於是績後股價無以為繼；第三方面，係睇公布業績當時市況，市況越好，對業績嘅寛容度會較高，股價更易裂口急升；最後睇埋期權市場狀況，績前多資金買上，績後較難上升。綜合上述現象，業績反應更趨向複雜化，令人無所適從。

以今個星期為例，Salesforce（CRM）、Pure Storage（PSTG）、Marvell（MRVL）績後股價爆升11%至22%不等，其中CRM及PSTG業績都唔係一面倒利好，股價反應理想亦因近期美股市況不斷破頂帶動，投資者變得更寛容、更願意高價追貨。

Salesforce爆升是修正「錯價」

當中可以留意一件事情，Salesforce喺今年首季業績時，曾經下調收入指引，令股價大跌。及後兩個季度，證明管理層下調收入指引係多餘，業務表現持續理想，陰霾一掃而空，於是今個星期CRM績後股價上升，係將之前嘅「錯價」進行修正。

今次業績期只隨機炒部分個股，部分原因係市場資金未足夠一次過將所有績優股拉高，換言之，只要個股業績持續向好，「錯價」績優股總有一日獲得追捧，或許要留待下一次業績期先至報復，形成績優股前後腳上升，但趨向同一終點。至少有一批業績後升到離哂譜嘅股票，證明仲有唔少股份等待報復，亦係美股尚未見頂嘅徵兆。

晉佳

https://www.patreon.com/user?u=28525578

相關文章：

美股牛市死唔斷氣 見頂要睇一個現象｜晉佳

港股兩件令人振奮的事｜唐牛

維他奶大戰未到戲肉｜曾智華

Clockenflap光環褪色：盛事經濟如何迎合Gen Z世代？｜梁偉聰

退休期有幾長難掌握 李聲揚分享三種預算方法 「最怕人在天堂錢在銀行 沒享受過人生」

恒指過去25年升45% 年均回報僅1.5% 林本利：盈富未能創造財富