伍仲衡被炒魷｜選秀節目評審頻惹爭議 肥媽趙增熹躺著中槍 《全民造星》現最hea評判 陳潔靈：評語要到肉
2024-12-10 15:40 
音樂人伍仲衡近日被停任《中年好聲音3》的評判工作，事後TVB發聲明表示：「關於節目《中年好聲音》評判狀況，本節目一貫邀請具有不同專業背景的音樂評審參與，以確保節目的專業性和公正性，選出真正具有才華的音樂人才。」伍仲衡被「炒魷」調出《中年好聲音3》評判團，獲不少網民大力支持，有網民直指不滿他的評分準則。其實過往不少選秀比賽的評判表現都曾惹來質疑，《星島頭條》為大家重溫多位曾被批評的選秀節目評審，包埋肥媽、趙增熹等爭議事件，到底網民為何質疑他們的表現？當事人又如何面對網民的批評？
伍仲衡做評判表現被批評
facebook群組「中年好聲音3粉絲情報交流討論分享區」日前有網民分享，留意到伍仲衡被「炒魷」的消息一出，按讚的人數眾多：「剛剛發現一個群組，入面九成幾嘅人都係因為伍仲衡畀人炒而讚好，大家有興趣可以去睇下佢哋嘅留言，另外仲有好多群組係大部分嘅人都係贊成或者為伍仲衡畀人炒而高興，小弟都係照事實分享，其實好簡單，我都係search伍仲衡個名，之後入啲群組先知道原來佢咁多人討厭佢，係一面倒。」而留言區亦有網民道出認為伍仲衡雖然是音樂人，但不適合做評判的原因，「抵炒，一個不負責任嘅評判。唱得好吾（唔）好都係吾（唔）比（畀）燈、返屋企瞓覺啦送佢四個大字不知所謂」，連伍仲衡亦曾分享，在電視城巧遇李家鼎，對方都向他表示：「撳燈呀！」可見伍仲衡「手緊」已成他的形象。
相關閱讀：伍仲衡被「炒魷」後首談中止合作感受！強調與TVB冇不和 揭簽洪心怡真正原因
選秀比賽評判唔易做？
伍仲衡「港普」成爭議點
亦有網民認為《中年好聲音3》加入新加坡、馬來西亞及大灣區的選手，但伍仲衡的英文及普通話都不及其他評判流利，說評語時有所規限，有網民尤其不滿他多次以說港普做搞笑效果，「炒得好，這年頭不會聽國語、講國語要當甚麼評審」、「吾（唔）識國語冇問題，佢仲以此自豪」，不過亦有網民指出，伍仲衡的港普是節目特色之一，認為很有效果，可見網民反應兩極。
肥媽「長明燈」評分準則被批評
肥媽（Maria Cordero）是《中年好聲音》系列固定評判，三季以來網民對她的質疑不比伍仲衡少，近來《中年好聲音3》熱播中，她在比賽初期多次極速按燈給參賽者的行為一度受網民質疑。曾有網民在facebook群組討論說「聽一句就按燈我真係唔知佢想點」、「一個可有可無的所謂評判『瑪利亞』不單只亂按燈，聽一句就按燈？還要影響其他評判」，連拍檔伍仲衡也曾在節目中笑指肥媽「盞燈未熄過」。肥媽當時的回應：「人哋打低咁多人嚟到呢度，唔值一盞燈咩？」對於網民批評「長明燈」做法，其實肥媽亦曾回應因要有一盞燈，參賽者才可以露面，她視按第一盞燈是「鼓勵燈」。事後有網民認為肥媽專業且富同理心，直言是「躺著也中槍」。
相關閱讀：中年好聲音2｜楊千嬅任決賽評判被狠批未夠班 伍仲衡遭拖落水反擊網民冇常識
趙增熹評語狠毒又直接
TVB的《聲夢傳奇》系列近年為香港娛樂圈發掘不少新星，不少網民對於評判應該以鼓勵形式還是嚴格形式評分採兩極看法。音樂人趙增熹2021年為《聲夢傳奇》擔任評判，當時他被網民指批評參賽者的評語太狠，其中一集，他評論Rock何晉樂、泳兒、JW王灝兒唱出《裙下之臣》的表現，直斥Rock何晉樂在表演中可有可無：「你喺呢個表演入面係失蹤咗，你喺唔喺度都得㗎！因為冇人睇你呀，咁你企喺度做乜嘢先得㗎？你喺呢個表演中要做個咩角色，令我哋會睇你呀，全部評判同導師都係望隔離（泳兒、JW王灝兒），但我唔係畀分畀佢哋呀嘛，係咪？」
作為本地音樂界的殿堂級人物，趙增熹在節目中的評語一向犀利，一眾同場歌手被嚇一跳。事後趙增熹曾指，認為自己只是「做開平時做嘅嘢」，對於被網民質疑打擊年輕參賽者的信心，趙增熹表示：「冇咁諗，只因少時間評論，所以盡快講，直接啲好嘅。」
《全民造星》曾現最hea評判
ViuTV的《全民造星》系列近年同樣捧出很多偶像，過往亦找過很多行內人做評判，當然亦有評判受到批評，當中包括蕭定一、張建聲及導演吳漢邦都被網民批評評語太「hea」，連當時的導師劉美君都忍不住衝到台前理論。蕭定一曾在其中一個環節以邱士縉（Stanley）的胸肌成為二選一的準則，又指涂毓麟（Oscar）的名字太普通：「你覺唔覺得Oscar呢個名比較普通？會唔會好容易同人撞名？」連涂毓麟本人都覺得奇怪，曾受訪表示：「本來預期comment係同表演有關。」姜濤亦表示：「我喺後台聽都有啲奇怪，唔係好理解，好似搞唔清重點。」
《全民造星》導師不滿評判言論
除了蕭定一，張建聲亦曾在節目中點評參賽者的造型：「你個頭搞乜」，而導演吳漢邦看不懂表演安排亦表示：「做咩要掟啲眼鏡啫，即係你見唔到咩原因要咁做，除咗你覺得你自己好型之外。」導師火火都覺得批評不合理，「咪就係要話你知『我哋好型』囉！」導師Eric Kwok郭偉亮亦質疑評判只懂抨擊名字、髮型，未有全面評論表演的實質問題，監製花姐亦不滿：「可唔可以講啲有意義嘅嘢……火都嚟埋呀！」劉美君更直接爆粗：「X你個肺！」她曾受訪表示：「我忍無可忍決定講清楚，我都戥ViuTV唔抵，因為有人喺網絡留言，認為有設計情節。我呢個人鍾意伸張正義，做呢個節目係想幫呢班有心喺呢個圈發展嘅細路，有人唔認真批評，我好勞氣。」
相關閱讀：40歲張建聲晒咀嘴照認愛！與工展小姐發展父女戀 嫩口女友頻晒豐滿身材勁吸睛
王貽興被批評語太刻薄
王貽興在《全民造星II》99強首回合時，曾以導演及編劇身份擔任評判，他被網民指評語太刻薄。其中一集王貽興對YouTuber Boris（黃浚銘）的唱E-kids代表作《開始戀愛》的表演相當反感，更聽到扔筆，他指：「其實要唱得好過E-kids真係唔難，但你出咗事……唔難唱、唔難做，你只要五音全啲，成件事認真啲，已經可以好好睇。我覺得佢係一個好charm好可愛嘅小朋友，但係唔適合入行，我頭先睇好似隔離台10年前兒歌頒獎典禮，好打冷震。」Boris更被拍到在後台痛哭的畫面。
相關閱讀：MIRROR演唱會丨王貽興大爆ViuTV內部黑幕 數臭有人私相授受度縮慳皮
王貽興對星二代都冇面畀
另外，王貽興亦指參賽者魚旦將唱歌與演戲結合影響發揮，「你不如單純地、用心地做好一個表演，唔好搞埋晒一堆立雜嘢，我都唔知你做乜！《全民造星》唔係幫你阿爸阿媽教仔嘅地方。」連旁觀的MIRROR隊長Lokman（楊樂文）也覺得王貽興評語太狠。
而有星二代光環的姜大衛兒子細John（姜卓文）亦難逃被王貽興狠批的命運，表演唱歌加Rap，卻因打扮被批評，王貽興指：「你仲着埋件Joker嘅牛件褸，但成事件又唔playful，又唔crazy又唔型。我哋已經係冇理會你任何背景，齋從你個表演去睇，其實係咁樣……如果大家了解你背景之後會對你更加嚴格，以你屋企人嘅背景，你做100分人哋當你做70㗎咋，所以你唔做夠130分，我哋好難畀90分你。」王貽興曾解釋希望可以嚴謹對待用心表演的參賽者，亦考慮到真人騷需要有效果：「所有嘢都係非常之有善、親切地將所有評語講出嚟嘅時候，第一節目效果唔好睇，第二對於參賽者嚟講，都唔能夠當頭棒喝畀到啲更好嘅意見佢嘅。」
陳潔靈分享做評審心得
陳潔靈本身是一名歌手，亦是歌唱老師，學生包括如今已是天后級人馬的容祖兒、Twins等。過往她曾為多個選秀節目擔任評審，包括《超級巨聲》、《全民造星》及《中年好聲音》等，她接受《星島頭條》訪問分享做評審的心得，直言要幾分鐘內點評一位參賽者並非易事，陳潔靈表示：「其實有時畀評語係難嘅，我係睇個參賽者長遠有冇發展、有冇天份，我自己係歌手，我都參加過比賽，我希望以過來人身份幫佢哋得到更多嘢。」
陳潔靈說評語採直接風格
陳潔靈認為給評語最重要的是直接而且「到肉」，陳潔靈說：「你去參加一個比賽嘅時候呢條路唔易行，要講啲冠冕堂皇嘅說話唔難，但如果係個有資歷嘅評審，你唔係想佢（參賽者）發夢㗎嘛，都要現實啲，有啲嘢佢要面對。佢唔係參加個比賽就前途一定美好、無可限量，佢啱啱先開始踏入去一個新嘅挑戰，應該要畀佢一個心理準備，唔只係唱唔唱到嘅問題，有時心理上都要承受一啲嘢。佢接受到都對佢日後有幫助，接受唔到都唔好發白日夢啦！返學都有啦，你唔得，人哋咪畀個D你囉，唔通你話老師『肥』我，傷到我自尊心？咁點得呀，一係就唔好參加。」
陳潔靈做評審絕不人身攻擊
陳潔靈給評語亦有個人宗旨，就是不會人身攻擊，「我唔會講一啲傷害佢嘅說話，即係我唔會話『你咁醜』，如果係批評個樣、衣著……太狠批嘅就冇必要，因為同唱歌係兩回事。」陳潔靈更想為評判抱不平，「其實我哋講嘅說話可能係有前文後理講咗3分鐘，但節目可能只係剪你一句，你冇睇前後聽落就好似好hurt，咁唔公平。咁我又唔覺電視台錯，佢係個娛樂節目，唔通畀你講晒3分鐘咩，但如果句句評語都剪晒出嚟個節目可能係8粒鐘，現場錄可能有嘢鋪層去同個參賽者講，但佢一揀就揀咗嗰句。觀眾唔知就以為你嗰句說話咁辣，咁對評審嚟講好難做。不過其實我哋都預咗，所以講評語時都會好小心，盡量做到對事唔對人啦！」
陳潔靈做評審一招避是非
陳潔靈過去做評審雖然嚴格，但甚少因評語而被批評，她直言可能自己好彩，不過她向來不以評人為接評審工作的目的，「我係想同參賽者分享，我希望佢哋有得著，我未必啱晒，但都係希望幫到佢哋，我唔係想潑人冷水。可能有時我講評語都偏技術性啲，就避咗啲是非啦！」
陳潔靈指評審自行找定位
對於有網民質疑，可能選秀節目都需要效果，安排評審分別擔任「好人」與「壞人」的角色，陳潔靈分享原來節目組從來沒有這樣的安排，「其實唔係設定嚟，係每個評審有自己性格，自己搵到定位。我做過唔同節目，都冇叫你點做㗎。我就希望可以客觀啲，有時見到真係好嘅，反而多啲嘢講，更加針對佢嘅弱點，呢個就真係愛才嘅，就係因為佢叻，更希望佢再進步。」
陳潔靈不想簽歌手：我唔係一個人才
被問到有沒有「評審癮」，陳潔靈指近年仍有做不同比賽的評審，包括在過去7月舉行的《校園好聲音-唱響中國》比賽，「睇時間啦，有時間咪做囉，我都enjoy嘅，做評審嘅過程中都認識到好多超班嘅新人。」至於有沒有簽歌手的計劃，陳潔靈表示：「緊係唔會啦，一定唔會！因為我冇資格，簽人你要有好多connection（聯繫），我亦都唔係呢方面嘅人才，首先我唔係一個人才，我知我唔係人才就緊係唔會做，雖然有好多人叫我簽邊個簽邊個……唔係嘛，講都唔好講啦，自己知自己事。咁人人唔同，或者人哋有聯絡、人哋諗法唔同，我就一定唔會囉！」不過陳潔靈不介意做介紹人，為唱片公司推薦有潛質的歌手，以往亦曾為蕭正楠、鄭希怡等後輩與唱片公司作介紹，不過是否合作成功則不想干預。
最新回應