維港會：大媽打尖上小巴有下文 守規排隊司機喝住「唔收錢」

有網民在社交專頁發文，指前日凌晨2時許在荃灣等小巴時，遇著一名大媽「打尖」衝上車，最終被司機及車上乘客合力施「妙計」驅趕。故事未完，該網民昨晚再更新續集，指昨日上車時又遇到同一名大媽及同一個司機，大媽今次「好乖有排隊」，好守秩序，司機見她上車，仲講話「上次你畀咗錢，想叫你(今次)唔使嘟卡」！不過大媽今次又「秒衝上車嘟咗卡」。

該名網民昨晚在facebook專頁「哈弟Hadee─我由乜乜徒步到乜乜」發帖，指原來大媽「打尖」故事有續集，「我真係冇講大話」，搭小巴再撞到個「阿姐」，指她今日好乖有排隊，又好似「愛回家」劇情咁，再撞返同一個司機。大媽上車時，司機好Nice地說「喂，阿姐！」，大媽即時好驚回了句「我有排隊！」小巴司機：「見到」，更同大媽講「我係想叫你唔使嘟卡，上次你畀咗錢，我諗住今次唔收錢喇，我唔係話你唔排隊呀！」。

不少網民睇完續集，紛紛留言，更力讚司機「好人」、「好有愛」，有「鐵漢柔情」的一面，指大媽「孺子可教也」、「知錯能改」，更有網民笑言「證明大陸人受硬唔受軟」。更有人指劇情絕對可以用來拍劇，笑指「劇情到最後，司機會同阿姐結婚」，「哈弟Hadee─我由乜乜徒步到乜乜」看到留言回應指，「最尾阿姐落車時，司機講咗句：我唔怕老婆，但都怕咗你！」。