梁咏琪问心无愧：已尽最大努力

（星岛日报报道）一连三场梁咏琪（Gigi）「时间遇上我们演唱会」前晚于红馆举行尾场，商台DJ梁文礼睇完Gigi演出后在社交网赞她靓，却被揭原来背后在私人社交帐号狂踩整个骚，遭网民斥双面人。Gigi在骚后坦承有进步空间。梁文礼昨日开咪做节目前公开道歉，并指Gigi有6尺高应该比一般人大量。
梁咏琪前晚完骚后受访，身材fit爆的她指现时55公斤，为开骚瘦了6公斤，在两个月前进行身材管理，现时体重已回到结婚时，她自爆落台时被女儿投诉点解多谢爸爸而没多谢她，Gigi解释家人已包括她，她又透露暂没计画开part 2，但亦很想再唱。
亲自邀请Edan做嘉宾

对于MIRROR成员吕爵安自去年7月后首次重踏红馆，原来是Gigi亲自邀请对方：「我一直好想同冇合作过嘅人合作，所以即刻谂起Edan，我一直有同佢保持联络，我冇谂过呢个问题（重踏红馆），佢都好好，一口答应我。」

对于有指梁文礼在私人社交帐号狂踩演唱会，Gigi表示不要紧：「一套电影，有时都有好同唔好的评价，我觉得唔紧要，最紧要我喺当中尽咗最大努力，每个意见我都会接受，的而且确我认为自己仲有好大进步空间，我会不断力求进步。」问她可觉得梁文礼是「双面人」？Gigi说：「我冇睇，私下亦唔系好认识，所以我觉得唔使理会咁多嘢，做好自己本分同眼前工作就够。（认清一个人？）我觉得唔系好关我事。」
「只系一个普通人批评」

演唱会出品人陈家伦则反问梁文礼是否很出名？得知对方是DJ后，寸爆对方：「佢系咪对时装好有研究？唔系吖嘛，对音乐好有研究？咁如果佢唔系呢两瓣翘楚，只系一个普通人去批评或者畀啲意见就由得佢，佢讲嘢系有自由，佢锺意点讲就点讲，一个普通人我唔想回应佢讲嘅嘢。（即唔当一回事？）Nothing！」他又指不知那个帐号是否真属于梁文礼，并谓就算普通人也可给意见及批评，演唱会好与坏让观众去衡量。

梁文礼昨日亦在电台花了很长的时间解释及道欺，他提到「我同梁咏琪、演唱会团队以及买飞入场嘅观众，讲声唔好意思，亦都对唔住，自己睇完第一晚后好肉紧……亦有少少自己意见，传媒就话狠批梁咏琪演唱会咁样，我都希望呢个回应，大家可以接受﹗同埋我冇机会联络到梁咏琪本人，冇佢电话或联络方法，我透过Vani传咗好大段文字畀梁咏琪，希望佢可以接受我嘅道歉啦！我有话畀佢知，点解我咁肉紧表达我对呢个骚意见，希望佢可以消化，希望嚟紧Gigi有新歌、有新演唱会嚟到《叱咤乐坛》呢到﹗」

梁咏琪经理人就梁文礼昨日致歉表示：「Gigi刚完成演唱会，我让她这几天在家好好休息。事情就让它告一段落吧！谢谢外界对演唱会的好评，整个团队都很振奋，Gigi也在不断力求进步，大家有目共睹，大家都放低向前行吧。」
郑秀文自爆唔敢穿波鞋

Gigi前晚邀郑秀文（Sammi）担任嘉宾，Sammi表示专诚为Gigi以「黑白双煞」造型现身，获Gigi赞认真，就算做嘉宾也特别穿高踭鞋，Sammi即笑说：「唔通着波鞋、矮你3个头？」两人合唱《我们都是这样长大的》，Sammi兴奋走到台边递咪给歌迷合唱。最后一众Fans大叫安歌，Gigi两度重回舞台并笑说：「最唔舍得走嘅其实系我！」前晚Gigi妈妈、老公Sergio及女儿Sofia齐捧场，还吸引台湾男星王大陆携「大马女神」女友蔡卓宜，周秀娜、郑融、苏玉华、汤怡及泳儿等撑场。