阿碌开咪｜愈睇拜登愈替美国……

假若我是美国人，一定会日比日担心。点解？因见到国家最高领导人，愈来愈唔对路。讲野口震震，精神明显不足，恍似有多少老人痴呆现象。面对记者提问，皆反应迟缓，间中问非所答。

其实去年佢上任时，已状态不算太好。如今捱咗大段高压日子，明显生理心理皆能量滑落。快八十岁了，正牌老爷车，点搞都唔会变回超级跑车，如何可以顶埋馀下三年任期而唔冧「偈」呢？

睇款，任何时候架「车」都会出事！

今天美国兵凶战危，日日与俄国及中国拗手瓜，西方国家又未见诚心诚意合作，冇乜兴趣旗帜鲜明认你做大佬，欧盟各国宁愿搞自己的「团结就是力量」。

一个弱势总统，必会导致内忧外患。国内共和党，尤其「狂人」特朗普，唔开尽Turbo砌你就奇。就算民主党及白宫之内，亦因领导唔够英明神武，有少少散散哋，势头甚弱。

最弊，假若拜登有乜头晕身馨，宪法上顶上的副总统贺锦丽，又愈来愈不对路，底牌实力见尽，冇乜料到。近日见佢出镜，已不复神采。

美国对内大撕裂，对外则面对一个「强肉强食」森林，点砌？老狐狸普京最叻趁你病攞你命，一于在乌克兰问题上企硬。

普京企硬，当有其因。老友，乌克兰与俄国边境接壤，若落在北约系统（俄国的死敌），等于「危害俄罗斯国家安全」，当然同你死过。

呢个世界，一讲政治，只有各自利益及安全，绝对冇话你啱定我错，纯睇企甚么立场！

呢场「沙蟹」，美国虽然要扮大佬，不过，普京睇死拜登优柔寡断，当然食住佢嚟砌，肯定有排磨。

乌克兰危机令美国头晕身馨，天降良机，北韩「肥仔金」立即趁你病恢复导弹试射，flex muscle。

中南海方面，一众领导人也可开返支茅台松一松，因近几年被美国佬逼到唞不过气。如今，起码有段安宁日子过。世事难料，若拜登搞唔掂普京，到头来可能要求北京帮忙，咁就好睇嘞！

曾智华

阿碌开咪