阿碌开咪｜住就可买，投资咪搞

坦白招认，我从来不是甚么投资明灯。不过，近几年真系日日有生张熟李在任何场合问：「碌Sir，应唔应该买乜乜乜？物物物？」

当中有外币、黄金、股票、车位、的士牌……最多系问买楼！香港人真是特别锺情「砖头」。

昨日又有一位「世侄P」，就快结婚，问我应否买楼？因佢同女友过去两年月付二万元租楼，近来楼价明显回落，但又不知跌几多，故此个心十五十六。

喂，老老实实，呢类一生重大投资，任何成年人皆应该自行决定嘛，因为其他人完全唔知你要求，乱畀意见，十九唔会中兼盏搞啦。

不过，为免佢失望，一于「李嘉诚」上身：「嗱，世侄，若果你睇啱一个喜欢单位，自住，又肯定供得起者，就可以考虑买。因为优质单位而又合眼缘的，非常罕有㗎。就算差几十万元，若住得安心舒服，绝对值。倒转，千祈咪贪平，买个又阴暗、又三尖八角兼住客质素差嘅单位啊。」

系咪讲咗等于冇讲呢？

「世侄P」颔首，谂咗三秒，又问：「其实我同老婆仲可以供多个细单位作投资，又好唔好呢？」

吓，乜原来佢咁富有？咁问我把鬼咩！

不过，都要真诚畀答案应酬下佢：「世侄，自住同投资放租两回事！自住单位，应似艺术品，价钱可以贵啲，但日日对住，一定要令自己心境平和快乐。投资，完全唔同，必须考虑有冇升值能力、甩唔甩到手，以免执条袜带累身家！」

小弟看法，如今买楼投资，绝非智者所为。原因简单：一、大量提供居住单位，解决居住问题，乃中央指定下任特首要做的重要任务，连地皮都划晒出嚟，楼价点可能再飞升？二、移民人数不停增加，BB出生人数不停减少，离世人数正常，意即总人口萎缩，单位需求亦相应下降；三、投资物业交N咁多辣招税，成本太高难回本；四、物业出租，若遇衰客，烦到癫，攞苦嚟辛……

总结：住就可买，投资咪搞！

曾智华

 

阿碌开咪