阿碌开咪｜罚款8千状费80万

早前睇报章，见到有单普通案件，被告上庭认罪，被法官照例训示一轮，然后循例话：「案情严重，为向社会传递清楚讯息，本席判你罚款八千元！」吓？八千元，有几严重呀？

最过瘾，电视新闻见到被告散庭后，笑笑口离开，猛向旁边位大状打拱作揖，衷心致谢。

刚刚那位大状Y乃我老友，又约咗前日晚饭，席间当然多口问佢：「哗，咁细单嘢使乜请大状呀？自己认罪求情都应该只罚几千啦，仲要请到你？喂，罚款八千，睇个款，状费可能八十……万喎！」

大状Y笑而不语，相信虽不中亦不远矣，因为你由请佢那刻钟就起表计钱。

「碌Sir，骑骑骑，值㗎！你知我做咗几多嘢？首先，搞清个客做乜畀人告。然后，陪佢落口供，肯定佢唔会乱噏嘢中多几条罪。仲有，肯定控方咪乱告或告多咗，又或告错。呢啲乃专业知识，你哋普通人多数蒙查查㗎！」

大状Y满满自豪咁款，灌大啖红酒。轻轻松松一单案最少执几十万元，真系……

「嗱，仲有呀，真正上庭前，要提议个客认或唔认罪。唔认，有乜Ground，打甩机会几大，兼且要使多几多讼费（因要排期再审）。若果认罪，我会替佢求情，写到有咁诚恳得咁诚恳，一定要讲到佢洗心革面，痛改前非……」

真㗎，间中我听见班状师替被告求情都想笑（相信法官也如是！），心谂，若你真系咁正人君子，孝顺又有社会良心，又点会一时唔觉意犯罪呀？讲笑咩？不过，你咁讲我咁听啦！

「碌Sir，其实请我做代表绝对值㗎，因几十年经验，在法庭出出入入，边个官『姓乜』我完全掌握，不少更属我师弟师妹，点都唔会去得太尽嘅。其实不少被告真系唔使请律师㗎，不过班友有头有面又有钱，而通常任何罪都会最高刑罚罚几钱外，另加可能监禁，咪个个脚软唔博罗，千分之一机会坐监都咪搞呀！你睇去年某某电视明星咪系咁罗！」

曾智华

阿碌开咪