阿碌开咪｜网上有个「大水塘」

今时今日，做传统电视台真系——大件事！　

睇睇股价，小弟呢类「资深传媒人」，发梦都未谂过，电视广播及有线电视两大电视台会惨成咁，直接感觉就是——该煨！

曾经七十几元的TVB，如今插到四个几。有线电视更大镬，曾经五个几，如今得返三仙几（执笔时），简直难以想像。睇睇两家公司的PE及息率，也是空白一片。呢个现象，若果新公司，仍可以话系投资期或开始高增长期，但两家乃老字号，管理层真系日日要抹冷汗，老板面色会点？

呢边传统电视台谢晒，但另一边的网上世界，则嘭嘭声到得人惊。

单讲讲两周前被捕的一个KOL，若非此案爆出，小弟都唔知，原来「可以咁搵钱」！

简简单单似江湖卖艺，在网上扬言传授「沟女术」，保证成功，咁即有N咁多人愿畀七万几元一年学野。一个七万几元，十个七十几万元，若有一百个就七百几万元，丁KOL可能根本冇报税！

哈，真系咁笋？引起我好奇，立即访问几位「网上商业」专家，点解咁劲！

「碌Sir，简单，好多野网上做得，传统电视台唔做得，勿讲话粗口、三级、四级内容，单单讲『教人绝技』，个水塘已大到你唔信！」

专家B指出，一般人有不少私隐难于启齿的期望，简单的例如医秃头、减肚腩、丰胸……进一级的例如壮阳、增加持久力、沟女（或仔）……都大把人肯付出重金去学。

引呢类人入局手法，乃首先在网上卖广告，话有免费训练课程，为你度身订造，欢迎试学。

人人皆有贪念，一听见可以生发、减肥、发达、变靓……又课程免费，当然仆去上。

唔怕你精，唔怕你呆，最怕你唔来。只要KOL说服到你深信有机会成功，咁个个就由免费变付费，人人交几万元去跟进，一个几万元，一百个就有几百万元。

呢类课程，部分不是骗人（否则难以继续），但所教的，传统传媒肯定冇，慢慢网上「大水塘」就成形了！

曾智华

阿碌开咪