阿碌开咪｜应该收咗工才颁

上周五早上，如常撞入茶记，隔篱枱已有三位粗豪的士大哥在开坛，摊开张《星岛日报》在枱面，你一言、我一语踊跃发言。我行过瞄一瞄，咦……原来睇紧全版广告——「热烈祝贺港区省级政协委员联谊会成员荣获2022年香港特区政府勋衔」。　

肥佬文：「哇哇，犀飞利啊，一野扫咗五十几个勋衔，仲有三个大紫荆，真系唔野少。其实，点先可以做到政协委员的呢？大口强。」

大口强：「我知就唔使揸的士啦，懵佬！不过，今年张名单好过瘾，七个大紫荆之中，有三个唔知点选出嘅，骑骑，佢哋都攞到，我都应该攞到噃（不停奸笑）。你话系咪呀高佬华？」

高佬华：「求求其其啦。我哋无权无势，勋章又唔系直选嘅，当然边个有权边个话事啦。啲人都废废哋嘅，成日揶揄派『荷兰水盖』为『政治酬庸』，唉，真系新嚟嘅，你估如今才如此咩？以前港英时代咪又系咁，你试下同港督唔Friend吖，橡筋箍都唔颁畀你呀。有权点解咁过瘾？正是我锺意做乜就做乜，勋章畀边个就边个！你张竹君医生三年来做到死死下残晒，民望又高，不过，本特首唔喜欢畀你就唔畀，吹乒乓乎？」

肥佬文：「（指住专栏「大棋盘」讲）呢呢，星岛个杜良谋就讲得啱嘞，引述部分建制派建议，高官应该离任始获授勋。大佬，睇睇个名单，不少仍为现届官员，包括特首，又有行政会议成员。佢哋仍坐紧官位，有权有责，使乜鬼表扬喎。理应收咗工，下台卸任嘞，先睇睇功绩，再决定颁勋衔嘛。如今太过有『你醒我，我醒你』的围威喂感觉。哈，难得连一向听话的建制派都觉得唔妥，想建议改例噃。」

班的士大哥虽打体力劳动工，但日日坐车内听新闻，对时事分析能力绝对不弱，我每朝听，发觉佢哋意见经常有料到。对小弟来讲，也提供不少早晨娱乐。

不过，咁嘈，好恶顶，幸而佢哋个《城市论坛》每朝只三十分钟，永冇拖长，啱啱好就收档。

曾智华

阿碌开咪