阿碌开咪｜香港最幸福的生意

周一早上七点，如常走入去惯去的茶记。哗！乜咁早几位「的士老是佛」已坐定定，开《城市论坛》。枱面有份《星岛日报》，摊开当日头条，人人七嘴八舌发表「伟论」。

讲开又讲，近期《星岛日报》，不少头条都触动到个别人士神经（马会大董争霸战为典型），与其他报章的大路新闻有点不同。

呢呢，周一头条又系「异类」，标题：《500尺单位需花300万，或削利润求出售，私楼建筑费飙两成，发展商叹捱打》。

内容指环球物流及原材料价格急升，建筑成本平均加百分之五至七。地产建设商会「大佬」梁志坚指，如今建筑费每方尺已升至五千、六千元水平（冇讲乜野质素楼盘喎，大哥！），发展商又唔敢加价，于是只好削减利润应对。

哈哈，今日个《城市论坛》，明显笃正茶记老板财叔条神经綫，第一个抢住发言。

财叔：「各位大佬！喺香港做生意，得嘅，几大要做发展商！边有咁鬼幸福㗎，赚少啲啫，已经成为报章头条！原材料加价？我哋呢行最清楚，但我够唔够胆转嫁畀各位大佬吖？今年年头，一个早餐三十三皮，都只敢加一蚊咋。有冇报章访问下我，等我吐苦水呀？」

肥佬华：「唉……咪系。我哋哎吔叫做的士车主，都系做生意，个牌由七百几万元掟到落嚟如今四百几万元，惨到无伦，蚀到眼凸，点似地产发展大哥咁，赚少啲变新闻㗎，香港独有！」

高佬强：「系罗。我哎吔读过大学经济100，故此，知道任何商品，当然包括的士牌、食物，以至物业，全部定价只讲供求，不讲成本㗎啦。老实讲，消费者鬼理你成本几多咩？我个牌七百几万元投返嚟，唔通同乘客喊咩？大佬，咁嘅成本，日日蚀住做㗎！」

我听落都各有道理。大家只要睇睇几大发展商每年业绩报告，就知佢哋长期以来，全部赚到「肥到着唔到袜」，羡慕死其他生意人。所以，如今只系赚少啲啲，其实应该低调少少，老友，好多「酸葡萄」㗎！

曾智华

阿碌开咪