【独家】首演排球员笑料百出 MIRROR四子互窒狂爆瘀事
2020-12-10 01:01 
MIRROR成员Anson Lo（卢瀚霆）、Jer（柳应廷）、Edan（吕爵安）和Tiger（邱傲然）最近在ViuTV剧集《男排女将》饰演热血排球运动员。由于四子都唔叻打排球，拍摄时闹搞出不少笑料，特别是当中公认最屎波的Edan，加上他忍唔住笑，更连累大家NG，最搞笑他访问期间永不认输，俾其他成员围攻依然死撑，相当有体育精神。撰文：杜淑霞 摄影：张咏森 服装：izzue 场地：Nutshell Hong Kong
四人都话本身唔叻打排球，当初试镜为争取角色，竟以不同藉口跟排球拉上关系，譬如Edan就话阿妹识打排球，到他拍摄时当然出事，其馀三人更直指他最屎波。Tiger解释：「我系用呢个考虑因素，我同佢磋波嘅时候，佢执波多啲。」但Edan却死撑，「因为我啲波太高难度，佢哋接唔到，佢哋水准未够。」Anson忍唔住暗寸话：「佢有时特登打啲波去咗第二个场，想我哋去追返嚟，系用心良苦嘅，等我哋有多啲体能训练，不过如果Roll紧机唔使训练我哋就最好。」Jer补充：「但系拍剧就唔好咁多呢啲（训练）罗！」
鼻窿出事
讲到拍摄时难忘事，Jer自爆因同肥仔及193挂住讲笑吹水，搞到俾导演闹，「因为同佢哋太熟，由《造星》到依家，就会放松咗，会讲笑，有时倾偈唔系太集中，咁样喺片场系有少少唔专业嘅。我哋试过俾导演闹『你唔相信呢场戏就唔好拍啦！』嗰场戏讲我哋系笑Anson唱歌，导演闹完之后，我哋全部认真去做番。」
不过，四子的虾碌嘢，甚至搞到cool cool地的邓丽欣（Stephy）都笑埋一份。Edan说：「有场本嚟Stephy同顾定轩好认真喺度讲紧嘢，但系Jer一见到我个样无端端笑咗出嚟。」Jer解释：「因为佢有时啲戏系好尴尬，我讲Edan呀！人哋好认真做紧场戏，但系佢无端端喺度扩张咗佢个鼻窿，我记得我嗰时讲咗一句『好』，佢就咁样啦！（扮Edan表情）。」Anson再补充：「因为佢（Edan）好多时忍唔到笑，所以佢自己喺度震罗！」Jer话有过这次经验后，学识了借视线，之后拍摄都不敢再望Edan个样。最后他们又爆Tiger为一场沙滩晒肌戏，狂操身材搞到连排球衫都差点着唔落，「导演见亲我就闹，你唔连戏呀！因为差咗成10磅。」
最新回应