【独家】开心《坚离地》拖足3年终播出 张振朗笑指似初恋特别深刻
2021-01-14 18:57 
刚在《万千星辉颁奖典礼2020》凭《反黑路人甲》的有型卧底「高彬」，夺得「最受欢迎电视男角色」的张振朗，最近在《坚离地爱坚离地》饰演毒男「希神」反差极大，其实该剧受「安心事件」影响拖足3年先有机会播出，振朗坦承已圆了自己心愿，因该剧是他首部担正作品，就好似初恋一样特别深刻，加上花了大量心思，真心想听到观众的评价。撰文：杜淑霞 摄影：谭壹致 发型：larry ho@aveda ilcolpo 场地：The AIR (The ONE)
对于凭「高彬」夺「最受欢迎电视男角色」奖，振朗坦承最初接拍《反黑路人甲》时很惊青，因为演喜剧相当有难度，「笑可能喺每个人口味好唔同，你可能觉得咁样好笑，我可能觉得咁样先好笑，准则好难拿捏，今次系几估唔到出嚟个反应，大家会咁锺意『高彬』，真系好开心。」
谈到恨了多时的《坚离地》终于播出，振朗认为心情反而轻松，「有得播我已经好开心，我都未试过播一套剧集我系完全冇压力，因为要睇上网已睇咗，咁想播出街为乜？系圆咗我自己嘅心愿。因为第一套（担正的剧）就好似初恋咁，永远系最好，呢套剧就系我嘅初恋，系会特别记得，如果唔系旧年上台领（「飞跃进步男艺人员」）奖，唔会上台第一句就咁讲（想该剧播出）啦！」除了情意结外，他又解释为该剧亦花尽心思，「第一套系特别尽啲，掉晒我咁多年嚟学过所有嘢，摆晒落部剧集度，我先会咁想睇吓个成果系点，同埋个角色同大家接触开嘅张振朗好唔同，所以想畀大家评价吓。」
振朗虽然在颁奖台没有提及女友杨偲泳，不过两人经常分别贴出去玩滑水及游电单车河的相，就知两人感情稳定，不过问到他女方是否结婚对象，他就冇正面回应，还带点怕丑咁答得极之小心，「佢好好嘅，系好好嘅女仔。」但他自认家庭观念重，一定会结婚，「我都想成家立室嘅，但系真系要睇时间，睇吓呢几年事业做成点先，又冇车又冇楼，好难讲其他嘢。」原来他目标要买间独立屋跟家人一齐住，看来杨偲泳要等多阵啦！
最新回应