35岁生日报喜佗B八个月　刘倩婷晒李丞责操刀大肚靓相

去年10月，本报已独家报道著名堪舆学家李丞责博士如愿以偿，跟结婚8年，09年港姐冠军刘倩婷（Sandy）追牛B成功，本报更曾拍摄到Sandy在李博士陪同下现身公开活动，穿平底鞋的李太明显肚凸凸，目测已佗B五个月。今日是李太的35岁生日，寿星靓妈趁机贴出大肚靓相公布佗B八个月的喜讯，大肚相意境好高，相中的Sandy肥肚唔肥身，手脚纤幼，面仔仍然好尖，绝对系靓靓大肚婆。撰文:廖思慧

记者忍唔住致电Sandy恭喜，听毕恭喜说话，靓靓大肚婆笑唔停，并开心分享再佗B及过生日的喜悦。因为交游广阔，好多朋友都跟Sandy庆祝生日，包括乐小姐、朱千雪、苏永康太太Anita、汪诗诗、汪圆圆及关心妍等。「朱千雪好忙，但佢都抽时间同我去酒店食Lunch庆祝。」因为Sandy的4岁囡囡李仟辰（Eldora）同关心妍囡囡杨荣心（Jovia）系同学，所以一众同学妈妈亦有约Sandy到其中一个同学屋企庆祝，「疫情关系好难得先可以聚一聚，啲家长都好有心机，用好多汽球布置，好靓好开心。」虽然疫情影响唔可以大肆庆祝生日，但Sandy笑言收咗超过20个生日蛋糕。

上周五，本报拍摄到李博士买花买酒同老婆庆生，当时李博士仲笑笑口话会亲自下厨煮生日餐贺老婆。问到好口福的Sandy最终生日餐食咗乜?「都系啲养肚嘅食物，增加骨胶原，好似鲍鱼、花胶同好多海鲜，我妈妈都有份食。」因为太开心，所以Sandy都有浅尝几啖靓酒。问到再佗B感觉?Sandy坦言较第一胎轻松，「舒服过第一胎，好享受呢次佗B过程，不过因为疫情都会紧张。」Sandy又笑言肚中BB系运动型，「系咁郁，好似喺入面做瑜伽咁。」而姐姐仟辰亦好期待BB出世，「佢好开心，未感受到佢有呷醋感觉，仲成日会锡我个肚，又会听吓个肚入面啲水声。」


至于一直好恨再做爸爸的李博士心情?Sandy笑得更大声，「佢求咗我好耐，终于成功，佢当然系好期待。」Sandy还指李博士摄影瘾大发，不断同佢影大肚相留念，「啲相佢尽咗力㗎嘞。」问到腹中BB性别?Sandy笑言未讲得住，言谈间笑声满载相当快乐。