【有火药味 】接受陈定帮访问闹爆老公 吴若希大除夕扬言：之后玩返你50年

有份参与TVB贺岁节目《天天开运王》玄学家陈定帮(Clement)最近喺youtube开咗个讲吓风水玄学频道，日前请咗娱乐圈「最惹火夫妻」吴若希(Jinny)同老公何兆鸿（Alex）一齐做访问，两公婆结婚3年多，育有女儿Giselle和儿子Kylian，但不时嘈嘈吵吵，节目中Jinny继续质问老公，好有火药味，连帮帮师傅都滴晒汗，Jinny又大爆两公婆闺房秘密。

 

投诉错失澳门派钱福利

节目一开始，两人即有火花，澳门人Alex自爆经已攞咗香港身份证，但吴若希讲起就嬲：「婚都结埋，我喺澳门住咗咁耐，唔知点解佢唔帮我申请澳门身份证？所以每年我都错过咗澳门派钱呢个福利。」何兆鸿尴尬解释：「主要比较忙…忙住陪老婆生产。」吴若希不客气反驳：「你行开啦你，我生产完喇！」

骑呢人配骑呢命格最夹

原来两人认识由陈定帮做媒，当日两人在evevt认识，Alex表示想睇陈定帮，由Jinny安排，之后陈定帮推介Jinny话：「呢男仔得，同你夹喎，而且好就你，畀你搓完压扁，尤其女人，要搵好锡自己嘅男人会幸福啲。」陈定帮补充话，有啲人有特别感情命格，所谓骑呢人要配骑呢命格，好似两条蛇缠埋一齐就分唔开，Jinny啱搵个外地人，或年纪有距离。虽然「巨门化忌」夫妻宫会吵架吵到七彩，但互寸可以化解。何兆鸿忍唔住爆句：「我冇寸过佢，系被寸！」陈定帮即打圆场：「夫妻有幽默感好啲！」Alex继续好不满话：「佢(吴若希)冇幽默感，一嚟就乸埋块面。」

 

怀恨老公婚前周围送花

讲到情人节，吴若希话每年老公要送花，但又想当年，令她嬲到震，火爆地再数老公：「当年佢追我时身在澳门，但同时间送咗99枝玫瑰畀第二个女仔，而佢又透过香港朋友送18支蓝玫瑰畀我，99枝同18枝对比，你话我有乜感觉呀？许廷铿仲好刻薄话，『佢买咗99 枝花，系咪送咗18枝畀人，其他唔知送畀边个，所以送畀你呀？』虽然好好笑，但我愈谂愈嬲！𠵱家都想爆粗！你解释吓点解咁做，系咪钱多呀？」Alex面红红说：「唔系，渔翁撒网系每个男人未结婚前做嘅嘢…」吴若希即提高声调指骂老公：「我想讲，想玩感情，唔好对住一个认真嘅人玩，玩完之后，如果唔离婚，我希望之后玩你50年！」搞到坐中间的陈定帮不知所措说：「我都唔知讲乜…滴汗！」吴若希再说：「我又有嘢讲，有次我大肚时佢帮我剥虾，我不停Keep住张嘴话虾虾虾…突然佢好躁底话『等吓啦！应份㗎！』但有晚我哋同帮帮及Bob一家饭聚，佢反而主动同帮帮师傅剥虾壳！」Alex解释：「因为我当时剥咗好多只，佢不停『虾虾虾』，我又要快剥，个女又食紧饭，有碗饭又未食，所以躁咗，事后我有道歉。」

和谐夫妻牀单被铺一致

吴若希经常系IG数老公不是，帮帮师傅问Alex会否嬲？Alex坦言：「睇到嗰刻梗系感觉唔系咁良好啦！」吴若希反问：「我爆你啲嘢前，你有冇谂过你做错嘢先？」Alex死晒狗话有：「所以我冇嬲过你，我经已去到我唔睇地步，系朋友转畀我，尤其老婆帮我生第2个，记性特别差，等我慢慢行开，或者慢慢畀佢赶走一阵，佢瞓醒就冇事，唔出声系最好表达。」陈定帮提醒夫妇们，牀单被铺要一致，感情会较和谐，最重要牀头板唔好有鎅开纹，否则代表有裂痕。

 

大爆闺房磨脚捽颈秘密

吴若希又不满瞓觉时老公会背向她揿电话，唔太理她：「我反而会向住佢，然后伸脚去磨佢脚脚，佢唔畀我磨，我会好躁底，瞓唔著！」何兆鸿带点不满说：「我第日要返工，要搵最快瞓觉方法，佢磨脚又捽我手臂同颈，搞足粒几钟都，佢先瞓得著，我好痛苦。」