【句句有骨】老公送电单车做情人节礼物 谢安琪曲线公审张继聪

谢安琪（Kay）与张继聪一向是圈中的模范夫妻，结婚14年日日初恋咁Sweet，更不时在网上互动耍花枪，你寸我一句，我又窒返你，温馨又搞笑。昨日情人节，Kay在IG公告收到老公送嘅情人节礼物，就系一部电单车，不过重点系张太并冇电单车牌，仲要送礼后，张生即刻抢用「礼物」出街耀武扬威，难怪张太要写文「多谢」老公。

Kay在IG写咗一篇关于「礼物的意义」的文章，透露阿聪送了一部中古棍波电单车给她作礼物，但她未有电单车牌，又笑指如果去考电单车牌，亦都只会考自动波，暗示老公的礼物对佢完全冇用。Kay搞笑表示收到礼物后好惊喜，又指这份礼物启发了她，成为她的人生转捩点，Kay幽默表示：「佢送呢架我自己揸唔到嘅电单车畀我，一定系代表咗佢想鼓励我跳出自己嘅既定框架，寓意只要我够胆尝试，就可以飞身跃起，骑上电单车开展一段崭新嘅人生旅程，睇到更多不一样嘅风光，一定系咁。」

之后Kay又暗寸阿聪唔理老婆，「自己揸走部车周围兜风」，最后她又指：「所以话一份好嘅礼物，你系可以有好多层次去欣赏，即使伴侣送一架你用唔着嘅电单车畀你，然后佢仲自己揸返，你分分钟得着仲多。」句句有骨，字里行间都感受到Kay的不满。好友赖慰玲留言笑指：「你先生爱得你好有Layer。」Kay亦幽默回覆：「同佢嘅演技一样，都好讲层次。」

昨日情人节与阿聪一同去揸电单车兜风的张振朗亦留言表示：「我终于知道以后送礼物应该系咩方向。」之后Kay亦有帮老公澄清：「同揸电单车一样『带返个头盔先』佢其实仲有送花同埋其他礼物嘅。」