【独家】老婆网上控诉婚后冇二人世界　黄贯中撇爱女拖朱茵买新衫

疫情影响下，呢两年唔少艺人转攻网上市场，现年49岁的靓太朱茵近日亦孖老公黄贯中（Paul）转型KOL，拍片玩「爱情五秒定律」问答游戏兼分享夫妻相处之道！朱茵趁机大爆Paul做老窦后，出街只拖实女儿黄莺，又呻好耐冇拍拖。结婚8年，虽然Paul直言好难卖甩囡囡，但听到老婆控诉后，出名「爱妻号」的他即付诸行动，日前《头条日报》记者发现Paul速撇「前世情人」，拖实「正印」朱茵陪逛又一城，仲贴心地帮太太拎战利品𠻹！采访：谭壹致

难得8岁爱女终于复课，黄氏夫妇即把握时间去又一城拍拖。日前傍晚5时许，Paul先与男助手去电器铺，主力睇数码相机和Headphone，睇啱心头好便叫职员攞新货，其间冇Gel头、眼肿肿仲有啲残嘅佢，未知是否老婆唔喺身边冇乜Mood，全程木口木面。逗留约半小时，Paul畀完钱就到楼上Weekend Max Mara会合老婆，原来素颜的朱茵早已在店内试新装，换上白色短袖Tee的她从侧面睇，D Cup玲珑浮凸身形表露无遗，见到老公嚟到，佢仲即刻问对方好唔好睇，Paul梗系识做赞靓啦！

耐心陪逛
为免畀压力老婆，Paul坐埋一边等对方慢慢试衫，及后朱茵一口气试咗4套衫，见她换了一件阔身直间长裙、一件格仔束腰长裙，似乎都比较锺情恤衫款。其间朱茵试得好认真，对住Fitting room块镜自转狂照，她不时问女职员建议之馀，又拧转身叫Paul帮吓眼。最后朱茵再转夏天Look，身穿贴身「雀仔丛林Pattern」Tee衬花碌碌长裙的她，已经试到攰晒、眼都蒙埋，随即换番自己套黑色短裙仔配斗篷。离开时，Paul就自动波帮手拎战利品，见个纸袋细细，估计只系扫走几条恤衫裙，有老公锡的朱茵亦拖实对方只手，与男友人一齐落停车场攞车返屋企，沿途冧猪的Paul都笑到双眼眯成一直线。