【有拖冇欠】蒲头解释默默工作摊还欠债 张致恒跪求放过老婆家人

张致恒（Steven）债台高筑，传借咗超过40万街数，欠债祸及妻儿，搞到老婆雯雯(区燕雯)近日被起底，压力大到爆煲，扬言：「放弃都唔会带两个仔！」被追债，Steven一直「龟缩」，直至昨晚先肯蒲头，他喺社交网贴上一张蓝天白云相，就欠债一事发长文，除咗再认错，强调冇走数、冇着草，𠵱家默默地工作，会好努力咁去工作，尽快还晒啲钱畀大家，更跪求放过他家人。

自2019年奉子成婚，被爆一脚搭5船后形象大插水，身败名裂，靠借钱渡日，月前更被指搬窦避债，旧屋信箱塞满追债信。借钱唔还兼失联，搞到债主之一嘅冯镓潆（Naomi）嬲到爆，要公开追债。可是，作为男人嘅Steven成个月都未有就追债事件表态，反而靠老婆雯雯挺身打同情牌，喺社交网贴文话，经已去到绝路向财务公司借钱冚债，澄清未有玩消失走数，他们一定会还钱。不过，雯雯承认要照顾两个仔及屋企，现金只系得$200，压力大到爆煲。

有还过钱但未还晒

昨晚张致恒眼见累及太太被起底，终于识得保护妻儿，喺社交网站现身发声，并指自己已找到工作，他说：「Hello，大家好我系Steven张致恒，首先好多谢大家嘅关心，我想喺度重新(申)讲多次，我冇走数我冇着草，我依(𠵱)家只系默默地工作，一直都好想还晒啲钱畀我所欠嘅朋友，讲真喺呢段时间真系过得好辛苦，搵到钱返嚟，我系有还过畀我嘅朋友，只系未完全还晒，我明白喺依(𠵱)家呢个时势大家都好穷，所以我会好努力咁去工作尽快还晒畀大家，想喺度同我嘅朋友讲声对唔住，拖你哋咁耐。」

老婆家人系普通人

对于雯雯压力爆煲，他就将责任揽晒上身：「仲有嘅就系，因为我嘅原因令到老婆嘅情绪唔好，所以我恳请大家要闹要话嘅，可以私讯同我讲，我好乐意畀你哋闹，希望大家唔好再私讯我老婆，佢要帮我照顾两个小朋友已经好大压力。」

有指雯雯出身纹身世家，外公相当猛料，曾为吴志雄、陈惠敏操刀，Steven跪求放过家人：「仲有希望各位记者朋友可以高抬贵手，你写我乜嘢都唔紧要，因为我系公众人物食得咸鱼就要抵得渴，但系我老婆嘅家人都系普通人一个，其实点解仲要攞出来讲呢？若果有一日你全家嘅成员，俾人摆出嚟你又会点谂呢？阿婆几十岁心血少唔吓得，同埋阿公已经过咗身，希望大家尊重阿公，跪求大家体谅！」