【独家】陪大肚新抱买BB嘢 家燕姐预咗有得重用

下月荣升「家燕嫲嫲」嘅薛家燕心情愈嚟愈兴奋，每天倒数迎接大日子，日日笑唔停。日前趁住复活节，难得儿子石耀庭（Jackson）及大女石佑珊都有假期，腹大便便嘅新抱仔陈素怡（Zoe）都破例出动，举家去咗铜锣湾shopping添置BB嘢，开心到爆嘅「家燕嫲嫲」讲到出口想儿孙满堂：「主要买啲安全嘅，可以重用嘛！」采访：方骞平

多年嚟薛家燕日日忙到癫，咁啱TVB综艺节目大改革，可以放低做咗4年的《流行经典50年》重担，真真正正享受吓人生，她开心说：「日前新抱仔带我去铜锣湾食Tea，我就陪佢睇BB嘢。我哋好似去咗泰国渡假咁，好享受！第一次同新抱仔行街，见佢个肚咁大，样样都睇住佢，不时叫佢坐吓休息吓，但佢步履轻松，反而会拖到我实，照顾返我。shopping期间，有唔少途人上前恭喜我，今年生日真系有好多惊喜。」

劲赞新抱
当日，家燕姐同Jackson主力睇BB睡牀、Car seat、奶樽及消毒器等，家燕姐仲忍唔住嫲嫲上身，出手抱起个身穿蓝白色间条A字裙嘅BB公仔，好有爱！问到系咪有喻意时？家燕解画话：「其实男孙定女孙都冇所谓，我一样咁欢喜。」家燕姐大赞新抱精明：「Zoe好精打细算，佢反而会从安全、稳阵、有质量嘅BB用品入手，反正可以重用。」疫情下家燕姐年几冇见喺内地营商嘅男友A君：「今年生日佢有送花，礼物就坚持要面交，呢方面咁我都明嘅。其实佢好想下月返嚟见吓BB，但佢做生意咁忙，要隔离比较麻烦。」