【独家】花姐凑仔苦与乐（二）之 为16个仔拍广告一个仙都冇袋

花姐（黄慧君）讲凑MIRROR和ERROR苦与乐，继续由2018年11月3日MIRROR正式出道讲起，当时花姐接受《头条》访问时话，有构思MIRROR仿效AKB做法，花姐这次就解释打消念头的原因；她又公开原来有个未圆的导演梦；又讲到虽然MIRROR和ERROR现在劲拍广告，但要靠花姐幕前演出帮补的背后原因。撰文：杜淑霞 摄影：谭壹致

2018年花姐说：「下年会再搞《全民造星》，但未必系男仔，我有个梦想《全民造星》嘅MIRROR，唔系个组合咁简单，系个乐坛历史，我想好似AKB咁，训练班有梦想嘅人，加入去等佢哋继续行MIRROR呢条路，佢哋都会大，都会个别发展，可以帮多啲人入行，将呢个精神带落去。」


花姐究竟之后为何又要改变初衷？


花姐说：「我第二年冇话好大胆咁将其他人渗入MIRROR，（嗰时话想加女仔？）我唔够胆咁做（系咪《头条》报道后fans好大反应？）系呀！但我唔系净系因为fans好大反应，系听佢哋好多意见都有啱嘅位，如果将啲人渗落去MIRROR度，好多人对佢哋有感情，陪佢哋一齐长大，由比赛到组合，突然佢哋已经唔属于MIRROR，可能会令到fans破灭咗某啲嘢。而MIRROR毕业又系咪件好事呢？！再渗人入去会唔会影响中间默契？！冇咁团结有兄弟情呢！？好多呢啲考虑就唔搞MIRROR，唔影响MIRROR精神，我就用《全民造星》包装呢件事，第一届做到MIRROR；第二届做到P1X3L同好多单头嘅人；第三届令到本身入咗行嘅歌手，更有实力发展，佢哋都属于《全民造星》。」


花姐监制了三届《全民造星》以来，遇到最大难题又是甚么？


花姐说：「我同制作团队最难系拍完edit出街，真系好辛苦，因为用好多唔同机拍好多唔同人，有好多segment真系灾难，基本上佢哋嗰三个月冇返过屋企，轮流返屋企一日，我好开心遇到班同我一齐癫嘅团队，唔会斤斤计较，为咗节目肯捱更抵夜，但我每次开《全民造星》都会有人嗌辞职，因为真系太辛苦，冇导演肯借过嚟我嗰组！（做经理人后每年只拍《造星》？）同鲁生倾咗一年做一个节目，佢就预我做《全民造星》罗！但我同宝姐（编审）都好想做其他节目，同埋我好想拍drama。我做《造星》之前，我写咗个故事大纲畀鲁生（高层鲁庭晖）睇，嗰时鲁生都话呢个故事OK，但系要继续写剧本同分场。我谂每个做制作嘅人，都有个导演梦，我由细到大都系跟综艺同埋音乐组，冇机会拍drama，自己可以写到个20集剧本系件好伟大嘅事。做《全民造星》跟住都冇机会写，啱啱呢个月我再pick up番，希望快啲完成，可以再sell畀鲁生。但我唔会特登写个剧本for MIRROR，呢个系我咁重要嘅BB，一定搵最啱嘅演员，佢哋都要casting。」

2018年花姐讲到ViuTV高层鲁庭晖跟金广诚对搞MIRROR睇法：「如果唔令到呢个乐坛或者演艺圈好，大家睇住佢沉落去，大家都唔会搵到钱，不如使少少budget，令呢个圈将来更好，佢哋比较有远见。」


出道两年几MIRROR和ERROR接拍的广告量惊人，是否已好赚钱？


花姐说：「预计5、6年先至可以回本，好多广告都唔代表（回本），我哋投资都好多，大家都知做音乐系好蚀本嘅嘢，佢哋每次出嚟化妆、梳头都系庞大数字，佢哋学做戏或者学乐器数目系好大，你谂吓我哋一年做廿几只歌，可能系其他唱片公司一倍！（一年使几多？）梗系有7位数，点解成日都话要自己揸车，想悭埋悭埋佢哋可以上堂音乐唱歌堂。佢哋第一年出道新人，好多job唔够胆收好多钱，仲要分畀12个人，跟住第二年社会运动同埋疫情都令佢哋少咗好多机会，但系嗰段时间对公司或者16个囝囝都好难，我记得其中一个成员同我讲，『我连搭车去rehearsal都冇钱。』（佢哋冇底薪？）有，但系唔够，佢哋要有外面工作先得，但公司已经对佢哋好好，出面好多公司连底薪都冇，鲁生同金生系个慈善家，帮佢哋捱得过，连去rehearsal冇钱真系好心痛。大家都觉得MIRROR好赚钱，暂时系错觉，我好希望第时唔系错觉。」


花姐经常亲自上阵拍广告，究竟同MIRROR和ERROR又有何关系呢？


花姐说：「我唔enjoy喺幕前，但拍广告系有原因，想减少公司负担，令MIRROR有更好嘅嘢，ERROR我唔担心，佢哋有生存方法，唔够钱都可以拍到只好好嘅MV，MIRROR系需要包装嘅男团，唔可以求求其其，搵12套衫都系钱，公司已经投资咗好多喺佢哋身上，我可以拍广告赚到钱减轻公司负担。（你冇入袋？）一个仙都冇，我本身唔应该拥有呢笔钱，我唔系幕前人（算唔算为佢地牺牲色相？）个个都系咁讲，我只系觉得拍咗攞呢啲钱可减轻负担，譬如当姜涛拍MV over要同公司交待，但有笔钱帮手顶咗条数喎！袋住喺度当个基金，就算冇工开有个基金当应急都好。我成日讲笑，公司冇预计Edan（吕爵安）同肥仔（梁业）出几多只歌，我就话畀住只歌你哋出住先，睇吓效果，但新人出一只歌真系搞唔掂，我谂住公司唔得都谂住攞呢个基金帮佢哋出第2只，𠵱家公司都认同佢哋实力，出第2只歌冇问题！（Edan好爆！）系！Edan系最唔使多谢我，佢系自己努力令大家锺意佢，唔系我畀机会佢，佢以前《造星》几咁努力，做综艺几咁投入，佢系凭自己实力得到今日嘅嘢。」