【独家】陈家乐为抗疫电影勤练假笑苏丽珊陆永被导演高招𠱁拍咀戏

2021-04-22 19:00

陈家乐、苏丽珊（Cecilia）和陆永最近在香港十间电影公司联手合拍的抗疫电影《总是有爱在隔离》中首度合作，虽然电影在疫情下拍摄，他们反而觉得更能体现大家群策群力精神。戏中家乐演酒店总经理，但事前竟然要苦练笑容；而苏丽珊和陆永初次合演未婚夫妻，他们大赞导演陈嘉上𠱁拍咀嘴戏够高招。撰文：杜淑霞摄影：谭壹致发型：Kenrick Siu 化妆：Khaki Yan 服装：Tommy Hilfiger

由于电影分三组同时间拍摄，陈家乐最开心一套戏见晒几年先见到的工作人员。不过在酒店同时拍摄也有一定难度，陆永说：「难度可能系我哋喺204号房拍紧，208号房要静静，再接住拍。」Cecilia补充，「紧接程度系A组cut，B组roll咁样，大家系分秒必争咁紧要，个氛围系大家好落力去做一样嘢，份团队精神有啲亢奋。」

戏中家乐演酒店总经理，外表以礼待人，实则心地劲差，Cecilia形容是邪恶，家乐说：「对住啲咁烦嘅客，一行开就畀个黑面佢哋，导演话喺个心度用粗口闹佢哋就得㗎啦！（陆：点知把口都讲埋！）哈哈！冇讲到嘅。呢个好快收番嘅笑要返去练，系陈嘉上导演建议我咁样做，佢演咗一次畀我睇，好多时人哋话我唔笑都似有笑，要练到畀人觉得唔系喺度笑。」讲到跟谷祖琳细女演对手戏，家乐劲冧，「佢系真天真，令我个心融化咗，记得有场戏未roll机佢喺度睇金鱼『我锺意呢只色，你锺意边只？』好冧！如果我有个（女）咁得意就好啦！」

Cecilia同陆永演一对准夫妻，为筹备婚礼经常有拗撬，「我有少少控制狂同强迫症，突然同我讲搞唔到婚礼，佢又咩都唔帮手就劲闹佢。」陆永笑指两人嗌交戏为主，反而亲密戏欠奉，「直情系冇，连揽都系哎吔嗰啲嚟，一路就闹闹闹，系去到最尾真系婚礼warm啲。」所讲的warm仲有咀嘴戏，陆永说：「嗰场我哋都唔知，陈嘉上导演话『咁多人睇你哋结婚咁开心，交换完戒指，你哋觉得点呀？我就认为咁样好啲！』（陈：高手导演，佢一早有呢个构思，专登唔写落去！）（苏：导演永远是对的嘛！其实都符合剧情）系呀！我哋又唔系法式咁，都系开开心心咁啫！」